Дир хирияй, хӀеренай...
Дир хирияй, хӀеренай...
Дир хирияй, хӀеренай, хӀурулгӀин гӀадай эбел,
Ургъалилъ дун вачӀани, гьеб бичулей дир эбел,
Рохел босун вачӀани, гӀахьал гьабулей эбел,
Нусго сон дица бани, гьебги дий кьурай эбел.
Дудаса халкъ бижарав рази ватаяй эбел,
Бахъанщинаб галиги, хӀухьел, бербалагьиги
Дие гӀоло гьабураб кинабго квербагъари,
Аллагь жинда разияб аза-азарлъун хъваги.
Дун гьитӀинаб мехалда рорчӀанщинал дур сардал,
ГӀоданщинаб мехалда берцин бицараб рагӀи,
Вакъарабго кваназе дие кьураб квен рикӀкӀун
Аллагьас дуй даража, эбел, борхизабеги.
Чан сон дий бугониги, кӀудав гӀун херлъаниги,
Кидаго мун, дир эбел, дий гӀакълу кьезе йиго.
Чанги ургъел гьабуна, чанги магӀу чвахана,
Чанги сардал рорчӀана, мун дида тӀаса лъугьа.
Дир гӀумруги, соналги, сахлъи-саламалъиги
Кинабго буго, эбел, дуй кьезе бугеб налъи.
Гьеб кьуниги кидаго дун бащалъизе гьечӀо,
Налъи бецӀизегицин дий гӀумру кьун букӀиналъ.
