Ункъмухъилал жугьаби

Иманалъул загIиплъи инсанасулъ тIатани
ТIолгояз кумек гьабун гьев чи витIун ккезаве,
ЗагIипав чи вугилан гьесда тIад релъанхъани
Бадисан баккулеблъи лъазе ккела щивасда.

Кинабго инсанасе бихьизе кьураб буго
Сахлъи, гьунар, гIакълу-лъай - гьеб гуреб цогидабги,
Кинабго хIалтIиялъулъ гIадлу-низам гьечIони
Гьабулеб данде багъи якъинаб хIакъикъатин.

Къварилъи дуе ккедал лъала дуе ватулев,
ЛъикIав-квешав гьудулги гьенив ватIа вахъулев,
Хъулухъ щун вохаравги, цогидал кIочаравги
Халатккун гьеб тахида хутIунгутIи якъинаб.

ГIабдалас мун веццани, гIакъил тIад велъанхъула,
Квешалдаса мун гьукъи гIакъиласул пишайин,
ЧIухIи чорхолъ бугони халкъалъе басралъула,
Духъа щолеб пайдаги хайир дагьаб букIуна.

Дуе гIакълу кьезе чи, кидаго камуларо,
ГIакълу бугес гурони малъараб босуларо.
ГIантасул малъа-хъвайги дуца гIадахъ босуге,
ГIадада мунго холел хиялалги гьаруге.

ГIадамазул гIаданлъи дуда лъалеб бугони,
Лъалезе щолеб лъикIлъи кинабго дуда бараб.
Гьабурабги кIочон тун кIарчанго мун хьвадани,
БадирчIваял гIемерлъун гIазаб дуего щолеб.

Хун хадуб кинасдего лъикIавилан абула,
Цадахъ ругеб мехалда нахъасан гаргадула.
Инсанасул хIал гурищ хIалкIолесда бихьулеб,
МашхIаралде щвезегIан щайзедай гьев толарев?

НИЗАМУДИН ГЪАЗИЕВ, ГIАХЬВАХЪ РАЙОН, ЦIОЛОДА РОСУ