КIудияб мажгиталде зиярат

КIудияб мажгиталде зиярат

Гьале нижги щвана зиярат базе,
Балеб мажгиталде, къокъаги гIуцIцIун.
БачIана нижеде гьединаб амру,
Аллагьасул нухда къватIир рахъине.

Жакъа нилъер ккола роххалилаб къо,
Мажлисалда нилъги гIахьаллъараб къо,
Мажгиталъул ахикь гъутIби рухъизе,
Гъираялда нилъей ирга щвараб къо.

Килдерил мусудул, росдал руччаби,
РачIа нилъецаги лъикIаб лъалкI тезин.
Дунялалъул рокъоб данде гьабураб
Гьенибе къиматаб цо мугь рехизин.

Ма ша Аллагь, гьаниб берцинлъиялъул
Балагьун гIорцIулеб хIикматго гьечIо,
Дунял-гIаламалъго данде рехараб
Аллагьасул рокъоб бакъ баккун буго.

Баракат рещтIана Дагъистаналде,
Дин камилаб улка нилъер букIиналъ.
Шамил имамасул ирсилаллъидал,
Инаро кодоса кидаго нигIмат.

Жакъа ниж роххарал, чIухIарал руго
Гьадинаб зиярат базе щвеялда,
Мажгит гIуцIулезул кьерда рахъун чIун,
Бикьулеб гьаб нигIмат боссе щвеялда.

ТIубана нижерги жакъа гьаб мурад,
Бихьана нижеда гьаб хирияб ракь.
ХIасратлъун рукIана гьанире щвезе,
Щибаб гали рикIкIун дугIа гьабизе.

Къабул гьабе, Аллагь, гьаб нижер гьари,
Гьуинаб каламгун гьанире щварал.
Раче, Аллагь, нижги битIараб нухда,
Балеб мажгиталда эхетун чIарал.

КИЛАЛЪА НУЦАЛАЙ