Бищун берцинаб цIар

Дие гIумру кьурай, дун гIезавурай,

ГIагарай дир эбел, ахIула дур цIар.

БухIи-цIорой дида лъазе биччачIей,

ГIазизай дир эбел, ахIула дур цIар.

Баркала дуй, эбел, дир гIумруялъухъ,

Дий гIоло рорчIарал бецIал сардазухъ.

Кинидахъ ахIарал дур сариназухъ,

Свин гьечIеб цIа гIадаб дур рокьиялъухъ.

Амма эбелалъул каранзул бухIи,

Унго, вас, дуда гьеб бичIчIулареб куц.

Эбелалъул рекIелъ кидаго дур цIар,

ЦIуне, Аллагьилан, угьулеб хIухьел.

Эбелалъул хъатир чIагого гьабе,

Гьей цеесан индал кватIун букIунин.

Гьелъул гъанситодухъ цIа ссун иналде,

КIвараб жигар бахъе хъулухъ гьабизе.

Гьелъул цере ккурал тIеренал кверал,

Кидаго гьабулеб дугIа васазе.

Аллагь, цIуне дуца дир лъималилан,

ЛъачIого тIинкIулеб бухIараб магIу.

Эбел, гьеб цIаралъул бугеб борхалъи,

Эбел, гьеб цIаралъул бугеб берцинлъи.

ЦIуне, цIуне, лъимал, нужеца улбул,

Гьезул хIатIикьлъидал нужее алжан.

ХIамзат ХIамзатов, Зивуриб росу.