ЧIикIаб ШагIбан бащалъи
СагIид-устар гьавураб Барааталъул сордо,
Ясин цIалулеб сордо, дугIа гьабулеб сордо,
ТIолалго муъминзаби ЧIикIаре щвараб сордо,
ГIалимазул советалъ мажлис гIуцIараб сордо.
МархIаба, лъикI щварав СагIид-афанди,
ВачIун щванагури Барааталде.
Дур къо кIодо гьабун ракIараразулъ
БукIана дурги рухI баракаталда.
Цогиги мархIаба арвахIазеги,
Дуда цадахъ щварал Ясин цIализе.
Накъшубандиябги Шазалиябги
Силсила букIана ЧIикIаб данделъун.
ХIасангиму ХIусен рачIун ратила,
ИсмагIилил Мурад вихьун хIалхьезе.
Хириял – Хадижат, ГIаишат, ПатIимат,
Узлипат-бажухъе раккун ратила.
Муршид, мун анилан мунапикъзабаз
ШаригIат хисизе дагьаб хутIана.
Хварав чи вачIунеб гIадат гьечIелъул,
Киназдаго лъана чIаго вугеблъи.
Шамалдаса вахъун Мадинаялде,
Билал щвараб гIадаб гIоди букIана.
Мун ракIалде щварал гIуламаазул
Гьаракь бахчаниги магIу чвахана.
Хасалил сордоялъ къватIир чIаралги,
Квачазе риччачIо рекIел иманалъ.
ЧIикIасезул росу малаикзабаз
Сверун ккун букIана, Мадина гIадин.
МахIшаралда гIадин букIана гIалам,
КъватIал цIун рукIана муридзабазул.
Бакъанида хадуб гьенив щваниги
Мажгит бихьичIого нахъе вуссана.
Ма ша Аллагь, росдал агьлуялъеги
Щуйил лъуна, эмен, гьалбал хьихьиялъ.
Пулав, чайгун кофе кодо-кодой кьун
Киналго рохараб букIана хъулухъ.
Мавлид бегьуларел щун рукIинчIелъул,
Берцинал гьаркьаца ахIана сирра.
Хатму-шазалия киназго цIалун
ЦIер гIадин арвахIал ахIана тIаде.
Муфтияталда нахърилъаян абун
ГIемер абулаан дуца, КIудияв.
Дирго жагьиллъиялъ дида кколаан
Гьеб бичIчIуларевги чи вукIинищан.
Гьанже загьирлъана зодиб бакъ гIадин,
Идара рихарал напсиял бугъби.
Жидедаса лъикIав чиго гьечIилан
Иблисаб чIухIиялъ чIван рехун тарал.
Мун вокьун рачIарал муридзабазе
Вореха, шафагIат, хирияв КъутIбу.
Мухъилъ чIезе чIухIун къватIир кIанцIарал
Бичасде тIамун те, хIукму къотIизе.
Нилъер муфти-устар, дуде аманат,
Дурго маъзунасе дугIа даимаб.
Нижги пакъирзаби, дурго абнаал,
Квешал ругониги къабул гьарун те.
