ВатIаналъ ахIидал тIаде вахъарав
ВатIаналъ ахIидал тIаде вахъарав
Рии дунялалда сверулеб мехалъ,
ГIумрудул свераби хисулеб мехалъ,
Хиялалъ букIинчIеб, бачIин хIинкъараб
Щвана нижехъеги рокьукъаб хабар.
Рагъулаб ишалъул цевехъанлъуда,
Къиматго вукIарав ХIосенов ГIали,
Къадар Аллагьасул тIаде гIунтIидал
ГIумру къо-лъикIилан сапаралъ ана.
Кидаго рекIеда хIинкъи букIинчIев,
ВатIаналъ ахIидал тIаде вахъарав.
ЦIияб ЧIикIаб росдал чIухIилъун ккарав,
РекIедайищ щвараб тIухьидул гулла.
Гуллица дур керен кверде босидал,
РакIалде ячIанищ хирияй эбел?
Чорхол рухIги лъугIун ракьалде ккедал,
Берда цеве чIанищ къуватав эмен?
Доб чияр ракьалда рухI босулаго
Ункъабго лъимадул ккарабищ ургъел?
Ахирисеб хIухьел босулеб гIужалъ
Яцалде щвараб хIал лъарабищ дуда?
ГIали, мун гIадинал гIамал рекъарал
ГIадамал ругодай гьаб дунялалда.
Дуца тараб гIадаб гIумруялъул лъалкI
Тарав чи вугодай, унго, ракьалда.
Рукьби рианиги дур эбел-инсул,
Абадиялдаса мун вуссинаро.
Керен тураниги гьай дур яцалъул
Кьварараб гьимигун мун вачIинаро.
Гьанже дур орденал ва дур медалал
Тарихалда ана дур цIаргун цадахъ.
Чанго батIияб гIел гьаниб гIуниги
КIоченаро даим мун лъиданги.
ХIалхьун кьижа, ГIали, росдал хабалалъ,
Хириясул къадар гьединаб бугин.
Къанще дуца берал, умумузда гъорлъ,
Сабру гьаби гуреб нижей хутIичIин.
