Нужеда рагIуларищ гьаб ГохIалъул ахIи-хIур

Бице нижей, АхIулгохI, дур ккараб къисаялъул,
КъуркьичIого къеркьарал васазул къисматалъул.
Бице нижей, АхIулгохI, цIагIадал бахIарзазул,
ЦIумаллъун роржанхъарал лебалал наибазул.

Бице нижей, АхIулгохI, бихьинал, руччабазул,
ТIад тIагъур лъун рагъарал гIещдерил мусудузул.
Тушманасул чорокаб квер жидеда хъвалалде,
Кьурса гъоркье кIанцIарал яхI бугел ясалазул.

Гьеб цIакъго къварилъана, угьун хIухьел биччана,
Аман, жакъаанищ дол, лебалал наибзаби.
Гьеб гIемераб мерхьана, къоял чанги рихьана,
Тушманасул квердаса Шамилица цIунана.

Нужеда рагIуларищ гьаб ГохIалъул ахIи-хIур,
Добаса тункIил кьвагьи, гьаниб чуязул тIваркъи,
Гъоба хъвалчадул чапи, чвахулеб биялъул сас,
Аллагьу Акбарилан цадахъ бачунеб такбир

Гъоркьлъалие васги кьун рагъ лъугIилин гьабураб,
КъотIи хведал Шамилил бадиса цIа пирхана.
ГIи гъуризе бачIараб гъалбацI кинниги Имам,
Тушбабазул боялъул бакьулъе кIанцIун ана.

Бихьуларищ имамас хьвагIулеб чармил хвалчен,
Чара хварал хъачагъал хъачадулел ругеб куц.
Бадиса цIа беролел Шамилил муридзабаз,
Исламалъул бацIцIадаб цIар цIунулеб бугеб куц.

Балагье дол руччабаз хеч тункулеб бугеб куц,
Берал къанщун къотIулел тушбабазул бутIрузухъ.
Дол цо лъимал рихьулищ улбузде тIаде къулун,
Берал рагье, бабайин, ахIи бан инагьдулел.

Дир ракI гIодулеб буго гIоралъ аразда хадуб,
Дир ракI угьдулеб буго бесдал таразда гурхIун.
Дир гьал беразда цере чан бахIарзал къанщарал,
РукъичIого ракъдада ракъван чамал тIагIарал.

Амма дун цIакъ бохула, къварилъи кIочон тола,
Имамас хIетI тIад чIечIеб тIанкI гьечIо дир мугъалда.
Гьезул биги дида тIад, гьезул гIетIги дида тIад,
ГIасрабаз лъугIулареб гьезул цIарги дида тIад.

Ниж цIакъ гIажаиблъана, гIодун гьаракь биччана,
Берда бихьарабгIадаб асар рекIей лъугьана.
Нижер ракI бахиллъана гьенир хваразда хадуб,
Квешго ракI къварилъана гьеб къокъадулъ гьечIелъул.

РАИСАТ БАТАГIАЛИЕВА, ГЪУНИБ РАЙОН, КIУЯДА РОСУ