Иман, ислам, сабру, напс

Ислам

Ислам щибан абуни,
Гьеб буго Бичасул дин.
БетӀергьан Аллагьасе
Инсан тӀуван мутӀигӀлъи.

ТӀадегӀанав Аллагьас
Жиндие кьураб гӀумру,
ГӀадамас гьаб ракьалда
Гьабиялъул къагӀида.

Иман

Иман - гьеб ракӀчӀун божи
БетӀергьан Аллагьасда.
Ишалги рагӀабиги
РатӀалъичӀел цадахъаб.

РекӀелъ гьеб букӀин гӀадаб
Берцинлъиги лъаларо.
Борцуна гьелъ чиясул
Чорхол яхӀги намусги.

Напс

Напс ккола гӀадамасул
ГӀишкъу, шавкъги гъираги.
ЩайтӀан-илбисгун рекъон
Къойил рухӀгун къеркьолеб.

Гьелде рагъ гьаби гӀадаб
РитӀухъаб ишги гьечӀо.
РакӀал сах гьариялъе
Сабаблъун жиб батулеб.

Сабру

Сабру щибин абуни, -
Гьеб буго рекӀел къуват,
РухӀалде бачӀараб хӀал
ХӀехьезе кумек кьолеб.

Аллагьас жиб нилъее
Алжанул кӀуллъун кьураб.
КӀиябго рокъоб талихӀ
Таризе биччалареб.

Тавбу ккола хвасарлъи,
Халикъас кьураб рахӀмат.
РакӀбухӀи мунагьалда,
РекӀекълъиги гьелдаса.

Ккарал мунагьаздаса
ВацӀцӀалъи тӀалаб гьабун,
ТӀадегӀанасда гьари -
Гьеле тавбу-ан-насухӀ.

Гьабураб мунагьалде
ТӀадвуссинчӀев лагъасе,
ТӀадегӀанав Аллагьас
Ажру цӀикӀкӀараб кьолеб.

САГӀИД ОРДАШОВ