Нилъер гIамал кибе щун бугеб...
Нилъер гIамал кибе щун бугеб...
ГIенекке, гъудулзаби, гьанже нилъеда бугеб,
ГурхIараб хIалалдаса хIакъикъат къватIиб кьезин.
ХIарималда рукъзал ран, рокъой хIарамаб баччун,
Бечелъараб халкъалда Халикъ кIочон тун вуго.
Хвейдал анибго толеб гIорцIи гьечIеб магIишат,
Тун какалгун гьабула, кваначIого цIунула.
ЦIулал чода рекIине ракIалда киб букIунеб,
Рукъ тун къватIив вахъине хиял бугев чи гьечIо.
Чурун, мусруги жемун, жаназа къаникь лъола,
КъваригIелалъ витIулев чилъун вихьулев вуго.
Рохьоса цIулалгIанги, цIолеб иццул лъелгIанги,
Лъил щваниги магIишат батIа гьабулеб гьечIо.
БетIергьанчияс нухлул ният гьабун тараб бакI,
БокIнида хIубалги чIван хIетIе чIезе бакI гьечIо.
ХIайваназ лъим гьекъезе гьарурал русби, хIорал,
Росдада кIалги гьикъун кквезе кIваралги руго.
Лъида щиб батаниги билараб чияр тIагIел,
Байрахъ гIадин борхула бетIергьанчи щивилан.
Щванани лъикIаб тIагIел, тIаде квер бегьилалде,
Кибехундай лъелебин лъороре раккарула.
Рокъоса къваригIелалъ къватIибе кьураб алат,
Къориниб ккарабгIанги нахъбуссун бачIунаро.
Бицунеб мехалъ - шайих, щолеб жоялъе - жуликI,
Жалин гIакъилзабиян гIакса унеб буго халкъ.
Хвалда ритIун кеялъул кколеб ургъелго гьечIо,
Ккун дунялгун анирго хIебтIулел гIадин руго.
ХIал щварабго Аллагьан ахIтIола нилъ киналго,
Куфруялда къвал бани, къана гIабдал дур талихI.
Тун руго БетIергьанас риччан гьаб дунялалда,
РоцIаралгун кьерхарал кьун руго рикIкIун къоял.
Кьун буго кIиго нухги, напсалъ тIаса бищизе,
Бергьин-къей дуда лъала доб рокъове щварабго.
ЩибгIаги хайир гьечIо хадуб ракI бухIаразе,
РакI бухIун чIаго рукIун, хIеле нуж РахIманасе.
Рикъзи хIалалаб гьабе, хIарамаб жо жибго те,
ХIабибасул нухдасан рачIана нуж Аллагьасде.
Аб дуниял къор буго, къойил гIадамал кколеб,
КъачIанагIан берцинлъун бер хъантIарав гуккулеб.
ХъантIиялъ хъурмацаги, кваначIого чIван тола,
ЧIобого тушбабазе толеблъи щай лъалареб?
Щвараб бакъалъ бихьулеб, балагьун чи гIорцIичIеб,
ГIемерал сериязул кино буго гьаб гIумру.
Кодобе щвечIониги, щивав чиясе билет,
Болжалги цIан хъван буго, воре, Аллагь, кIочонге.
Гуро нилъер гьаб ВатIан, тола гьаб анищалда,
Щолеб тун, толеб гьабун, воре, гуккизе чIоге.
ГурхIа, Аллагь нижеда, рижаравги Мунлъидал,
РухI бахъулеб мехалда хвалда ритIун ккезаре.
