Гьобол вуго инсан
Гьобол вуго инсан
Гьобол вуго инсан гьаб дунялалда,
Мекъаб гIамал гьаниб хIажалъуларо.
Хьулалги гIемераб, анищ халатаб,
Ургъел-къварилъиялъ цIураб дуниял.
РекIел къварилъаби къойил рихьула,
Ургъел гьечIеб заман дагьаб букIуна.
Жакъа цо-цоязул ригьнал рохалил,
Бакъан-хабар буго росулъ сверулеб.
Сордо рогьиналде цоги хъизанал,
Агьи лъун гIодула гIолил васазухъ.
Гьениса рагIула лъимер гьабунин,
Рохалилаб хабар тIаса унгеги.
Ва амма гIемерго заман иналде
Мадугьалихъ зигар рагIулеб буго.
Гьединаб дуниял - ургъалилаб гвенд,
ЛъикIаб хабар щваги щибаб рокъобе.
Эбел-эмен, лъимал, лъимадул лъимал,
Аллагьасул къадар, воре, кIочонге.
Кинал захIмалъаби рачIананиги,
Воре, сабру гьабе, даража щолин.
Цере заманалда бусурбабазда,
БихьичIеб къоялъул жеги бицуна.
Мисаллъун букIине, гIамал куцазе,
ГIамал гьабурасе пайда босизе.
Бакъвараб чед кванан ракъул заманалъ,
ГIодоса мугь бищун гIумру букIана.
Цо тIутI цебеги лъун лъимал сверухъ чIун,
Кваналел рукIана гIарзахинчIого.
Бихьараб захIмалъи кирилъун хъвайги,
ГIакъуба-къварилъи бигьа гьабеги.
