Гуниялъул бахIарзал
Гуниялъул бахIарзал
Бахlарчиясде
Кавказалъул мугlрул, тlогьал гвангъарал
Баккана цоги цlва, канлъи цlикlкlараб,
Цlа гlадинаб рагъда гьунар гьабурав
Вахъана бахlарчи Гуни росулъа.
Мугlрузул намус-яхl борхатго ккурал,
Рукlарал кидаго Салатавиял.
Чорхол рухlги бичун Ватlан цlунулел,
Лебалал цlумазул хирияб тlалъи.
Рагъул кlкlуй бетараб доб авлахъалда,
Рухlги кьун гьалмагълъи хвасар гьабурав,
Гьалдолеб цlадулъе бер къапичlого
Къадаралде данде хlетlе бегьарав.
Рагъул гlелмабазул гъварилъи щварав,
Гlажликьа ворчlулев батичlищ сабаб?
Хъван хадуб букlунеб къисматалъул нух
Таризе толареб, огь, доб къадаралъ.
Биччанте цlализе цlалдохъабаца
Дурги гьунар бицун тlад хъварал тlанчал.
Цинги букlине те абадиялъго
Мисаллъун хутlизе меседил мухъалъ.
Рагъул багьадурин кlодоги гьавун
Рана дур каранда орден, медалал.
Ватlан цlунарасул сси борхатилан
Борхатаб цlар кьуна дуе улкаялъ.
Орденаз чучулищ чара хвараб ракl?
Рекlелъ ругъун лъурай, огь, эбелалъул.
Эбел разияв вас, мун инсул чlухlи,
Чlухlдае рехсела росдаца дур цlар.
Моцlрол свери гlадаб берцинаб гьумер,
Гьимулеб букlина кидаго цебе.
Ракl чучун гlодизе росдал хабалалъ
Хобниги бугелъул сабруги гьабе.
Инсул тlалъиялде тlадвуссун щведал,
Щукруйилан щуре, вижарав эмен.
Магlица биччараб, бица белъараб
Тарих нахъа тараб нилъер умумуз.
Меседил хlарпаца гlарцул тlанчазда
Хутlила дурги цlар Хlасанов абун.
Парихан Мажидова
ТIагьавил МухIаммад, гьитIинаб лачен
Эбелалъул гьари, мунго цIунеян,
Каранда хьваниги, тохлъунищ, ккарав?
Щуго сонил цIали рекIехъ лъаниги
ХIалихьатаб рагъуй, хIадурлъи гIечIищ?
Дуцаяли гьеб рагъ, кинго къун течIеб,
Мунго гIадал васал гьенир рукIаго,
Дур цIаралъул гьунар, кинго ссун ккечIеб,
ЦIвадул кунчIигIадин, гвангъун гурони.
Чан анищ букIараб, гьитIинаб лачен,
ТIегьалеб гIумрудул, цебе бекьараб.
Щиб хьулдай букIараб бертин гьабизе,
Дадагун бабада къвалалги жемун.
Диргун гIолилазул, дур кьерилазул
КьогIаб хъарахъ бугин рекIедаги къан,
Мун гьаюрай эбел, гьединго эмен,
Ургьиб цIаги бакун режун ратила.
ЖужахIалъул цIа дуй хIарамлъагиха,
Эбелалъул адаб рехичIев чергес.
Алжанул каваби дуе рагьаги,
Инсул тIагъуралъул къимат ккурав вас.
