Хириял асараз ракI тIегьазабуна
Хириял асараз ракI тIегьазабуна
ХIабиб жанив гьавураб
Хирияб шагьру-рабигI,
Ихдал тIугьдул гIадинан
Дин цIилъараб хираб моцI.
Гьеб моцI кIодоги гьабун
МагIарухъе рачIарал,
Исламул бахIарзазул,
Асарал рихьаралищ?
Хириял асаразул
РекIелъ хутIулеб асар,
РакI тIегьазе гьабула
ТIоцебесеб къо гIадин.
Рихьизе аравщинав
Гвангъизе гьумер гьабун,
БацIцIадаб ракIги босун
ВачIуна жиндир рокъой.
Хирияв ХIабибасул
Берцинаб рас бихьарав,
Живго Расул вихьараб
Рохелгун щола аскIов.
Расалъул гьайбатлъиялъ
Гьесде бугеб рокьиги,
Жеги тIаде цIикIкIуна,
Хириясухъ урхъула.
Аман, дир хирав Расул,
Цо лахIзатниги дие
Дуда берчIван вихьизе,
Дур берцинлъи бихьизе.
Дур гьайбатаб гьумерги,
Гьединалго лугбалги,
Камилаб дур гIакълуги,
Умматалда гурхIелги.
Умматалъул цо муъмин
ЖужахIалде лъугьине
Рази гьечIинги абун
ШафагIаталъул кутак.
Киналго анбияал
Жидерго ургъалилъ ккун,
Къиямасеб къоялъги
Умматилан ахIдарав.
ТIоцебе алжаналде
Жиндир уммат ун гуреб,
БатIиялда мун рази
ВукIунарев дир, ХIабиб.
