Дир гьитIинабго насихIат
Нилъер жаниса рахъ дабагъ лъугьиндал,
Хвел-хобалъул хIисаб дарулъун ккола.
Дуниял течIого хун унел чагIаз,
ГIемераб гъапуллъи нахъе хъамула.
ХъантIун тIагIаталъе цере кколеца,
Каранда нилъер ракI хIалтIизабула.
Гьунар гьезул гIадин гIечIонаниги,
Нилъерго кIарчанлъи бичIчIизабула.
Дунял берцин бихьун, гьелде машгъуллъун,
Гьаниса инчIого рорчIизе гьечIо.
Аллагьас бижараб махлукъаталъул
ХIисаб гьабичIого бегьизе гьечIо.
Гьединго нилъее гьечIо бегьизе,
Лав анзална гьазал Къуръан кIочене.
КIудиял мугIрузул хIур лъугьунеб къо
Ахирисеб букIин рекIелъа ине.
Кинабго берцинлъи, тIолго гIатIилъи,
Нилъги кIодо гьарун гIуцIцIараб буго.
ГIибадат гьабизе рижун нилъ руго,
Гьабулеб къагIида малъа-хъван буго.
Берцинлъи гурони диналъулъ гьечIо,
Иман, рокьи, божи, гIаданлъи буго.
ЛъикIабщинаб кквезе, какараб тезе
Аллагьас киналго ахIулел руго.
Дирги цо васият, диналъул агьлу,
ТIоцебе дидего, цинги нужеде.
Чара гьечIеб хутIун калам дагь гьабе,
Ла илагь илла Ллагь гIемераб абе.
