Къеч буссинабулеб
Къеч буссинабулеб
Риидал хъарпуз гIемер кванала. Гьелъ къеч буссинаби гуребги, сахлъиялъеги пайда гьабула. Лъим, витаминал, минералазул ва антиоксидантазул къадар цIикIкIараб букIиналъ, хъарпуз рикIкIуна риидалил бищунго сахлъиялъе пайдаял кванил нигIматазул цояблъун.
Хъарпузалъулъ букIуна 90 проценталде гIагарун лъим. Гьединлъидал гьелъ кумек гьабула чорхол низам цIунизе, хасго багIарараб заманалда. Гьеб кванаялъ кумек гьабула лъим цIигьабиялъе, рахIатхвей лъикIлъизабула ва цIикIкIараб цIаканалда дандечIезе чорхое кумек гьабула.
Гьелде тIадеги, лъимгун кванил клетчатка (пищевые волокна) цолъиялъ гIорцIиялъул асар лъугьуна.
Хъарпузалъулъ руго А, С ва В витаминал. С витаминалъ иммунияб система щула ва чорхое кумек гьабула инфекциязда данде къеркьезе. А витаминалъул кIвар букIуна тIомол ва берзул канлъиялъул сахлъиялъе. В тайпаялъул витаминал гIахьаллъула энергиялъул метаболизмалда ва нервабазул системаялъул хIалтIулъ.
Хъапузалъулъ букIунеб ликопин ккола къуватаб антиоксидант ва гьелъ кумек гьабула чорхол клеткаби цIунизе.
Хъарпузалъулъ букIуна рекIел гIадатияб хIалтIуе ва бидул тIадецуй сахлъиялъе хIажатаб минераллъун кколеб калий. Гьединго гьелъулъ букIуна цитрулин абураб аминокислота, гьелъ квербакъула бидурихьал гIатIилъиялъе ва бидул хьвади лъикIлъизабиялъе.
Спортсменазеги пайдаяб буго хъарпуз. Гьелъулъ бугеб лъел, калиялъул ва аминокислотабазул къадаралъ кумек гьабула тренировкабазда хадуб къаркъала рукIалиде бачIинабизе.
Гьуинаб букIиналдаго цадахъ хъарпузалъулъ калориял дагь руго. 100 грамм хъарпузалъулъ букIуна гIага-шагарго 30 килокалория.
ГIемерисез хъарпузалъул хьон нахъе рехула, амма гьелъулъ руго къиматал витаминал: магний, железо, цинк ва сахлъиялъе пайдаял нахал. Цо-цо улкабазда мугь бакъвазабула ва сахлъиялъе пайдаяб приправа хIисабалда кванилъ хIалтIизабула.
Гьединго кваназе бегьулеблъун рикIкIуна хъарпузалъул тIомол хъахIаб бутIа, гьелъулъги руго витаминалгун антиоксидантал.
Хъарпуз кваназе ккола гьоркьохъеб къагIидаялъ. ЦIикIкIун кванани, чехь унтизабизе, кванирухъ понцIезабизе яги риххел щвезе бегьула.
ЦIодорлъи гьабизе ккола хъарпузалде аллергия бугел ва кванирукъгун бакьал унтарал чагIаз. Диабеталъ унтаразги хъарпузалъул кваналеб къадаралда хадуб халкквезе ва тохтурасул малъа-хъваязда рекъон хьвадизе ккола.
