Ражи – сахлъиялъе тӀабигӀияб сайгъат
Исламияб медицинаялда цебегоялдаса нахъе лъалеб букӀана ражиялъул сахлъиялъе бугеб пайда. МухӀаммад аварагас ﷺ рехсана гьелъул пайда, гьеб кванилъ хIалтIизабизе малъа-хъвайги гьабуна. Гьанжесел цӀех-рехаз тасдикъ гьабулеб буго гьел малъа-хъваязул хIикмат, гьеб гӀажаибаб тIагIамалъул гӀемерал пайдаял рахъал ругеблъи.
10 пайда
- Простатаялъул хӀалтӀи лъикӀлъизаби.
Бихьиназе ражи ккола простатит ва простаталъул аденома ккеялдаса цӀуниялъе лъикӀаб алатлъун. Гьелъ кумек гьабула тестостерон бачIинабиялъул къадар гӀадатияб хӀалалде бачине, бихьиназул сахлъиялъе квербакъи гьабизе.
- Холестериналъул даража гӀодобе ккезаби.
Ражиялъ кумек гьабула холестериналъул даража ва бидул лъамалъи лъикIлъизабизе, гьеб кӀвар бугеб жо ккола ракӀалъул ва лугбузул унтаби ккеялдаса цӀуниялъе.
- ТIулалъе кумек.
Детоксикациялда гӀахьаллъулел ферментал хӀалтӀизарун, ражиялъ кумек гьабула тIул бацӀцӀад гьабизе. Амма кӀвар бугеб жо ккола гьеб хIалтIизабиялъулъ гьоркьохъеб къадар цӀуни, къойие 1-2 гожо гӀола.
- Ццин лъикӀлъизаби.
Ражиялъ ццим кванирукъалде инчIого чIей тIагIинабула ва ганчӀал лъугьине биччаларо, амма нагагьлъун гьеб цциналъул гIузру цебего букӀун батани, кваналалде цебе тохтурасда дандбазе ккола.
- Херлъи хIинцлъизаби.
ТӀабигӀияб антиоксидантлъун кколеб аллициналъул къадар жинда жаниб цӀикӀкӀараб букӀиналъ, ражиялъ кумек гьабула клеткаби цӀилъизаризе.
- Иммунияб система щула гьаби.
ЦӀех-рехаз бихьизабуна гьоркьоса къотӀичӀого ражи кванаялъ чанго нухалъ дагь гьабулеб букӀин чорхолъе квач ккеялъул хӀинкъи.
- Метаболизм лъикӀлъизаби.
Ражиялъул ферментаз кумек гьабула квен бихIинабизе, хIажатханалде иналъул иш рекъезабизе ва хӀатта чорхол цIайи рукIалиде ккезабизе.
- Нервабазул системаялъул рахъалъ квербакъи.
Ражиялъ лъикӀаб асар гьабула гIадалнахалъул хӀалтӀуе, пагьму, цIодорлъи бачIинабула.
- Рак унти ккеялдаса цӀуни.
Ражиялъулъ ругел антиоксидантаз ракалъул клеткаби хехго гIун рачIин хIинцлъизабула, гьеб унти тIибитIиялъул хӀинкъи дагьлъизабула.
- Ферментированияб ражиялъул пайда.
Хасго къиматаблъун рикӀкӀуна ферментация гьабураб ражи. Щайгурелъул гьелъ жиндирго киналго пайдаял хаслъаби цӀунун хутӀула, амма тӀагӀамалъул рахъалъ хӀеренаблъун лъугьуна. Гьелъ кумек гьабула:
- бидул тӀадецуй гӀадатияб хӀалалде бачине ва ракӀ унтиялъул унтабазул хӀинкъи дагьлъизабизе;
- инсулинорезистентносталда глюкоза къабул гьаби ва гъорлъе лъугьин лъикӀлъизабизе;
- мех щвелалде цебего херлъиялдаса гIадалнах цӀунизе.
Кин хӀадуризе кколеб ферментированияб ражи?
- Щибаб гожоялдаса хъал бахъун, бащда-бащдаб къотӀула.
- ХӀадур гьабила цIамулъин (1 литр лъелъе 1 кIудияб гъуд цIамулги бан).
- ЦӀорол яги щагIил гъадринибе ражиги бан, тIаде тIола цIамулъин.
- ЛъикIго кIалтIуги къан, 7-10 къоялъ тела.
Ферментация гьабун хадуб, холодильникалъуб цӀунун, сахлъиялъе пайдаяб кванил нигӀмат хӀисабалда кваназе хIалтIизабила.
ХӀасил
Ражи буго Аллагьасул сайигъат сахлъи щула ва гӀемерал унтабаздаса цӀунизе кумек гьабулеб. Амма машгьурав тохтур Парацельсица абухъе: «Кинабго жоялъулъ загьру буго ва кинабго жоялъулъ даруги буго - гьеб бараб буго хIалтIизабулеб къадаралда». Гьоркьохъеб къагӀидаялъ ражи кванани (къойие 1-2 гожо) пайда букӀина, амма цIикӀкӀани зарал ккезе бегьула.
