Росдал чIухIи
Росдал чIухIи
ХIасан ХIилми ккола Болъихъ районалъул АнсалтIа росулъа. ГьитIинго цIалана Къуръан, гьеб рекIехъе лъазабизелъун хьвадана батIи-батIиял гIалимзабазухъе. РекIехъе Къуръан цIалиялъул къецазда кколаан цересел бакIалги.
2023 соналда гьев цIалана, ай Къуръан мухIкан гьабиялъул мурадалда, Сириялдаса хIафиз ГIабдуррахIман ибну Фарисида цевеги.
Исана Хасавюрталда тIобитIараб къецалдаги гьес ккуна тIоцебесеб бакI ва мустахIикълъана «Лада Гранта» машинаялъе.
Гьединго, 25 маялда МахIачхъалаялда тIобитIараб ДИУялъул лъагIалил цIалул хIасилал гьариялъул мажлисалда, муфтиясги кьуна гьесие хIежалде ине ихтияр кьолеб путёвка.
21 маялъ ансалтIисезул жамагIаталъ лъикIаб дандчIвай гьабуна ХIасан ХIилмиясда ва гьеб рохалилаб хабаралда хурхун тIобитIана росулъ кIудияб мажлисги.
Гьанже дица баркила, дир росдал чIухIи,
ХIасан ХIилми, дуда, дур гьеб бергьенлъи.
Росуго бохизе гьабурав дуе,
Батайги Аллагьас хIадурун Алжан.
Эбелги, эменги, кIияйго яцги,
Дур баракат камун гьел хутIугеги.
Хирав ХIабибасул шапагIатги щун,
Жаннатул фирдавсалда данде гьареги.
Дуца жакъа росу бохизабуна,
Вохизе гьавеги Аллагьас мунги.
Аллагьгун Авараг разияб гIамал,
Насиб гьабун кьеги Аллагьас дуе.
Хадубги баркула росдал агьлуялъ,
Дуда Къуръан малъун мун тIовитIарав
Нилъерго росулъа нилъер мугIалим
Хайрулал МухIаммад ХIафизасдаги.
Гьединго баркула, дур мугIалимал
АхIмадгун Зубаджи ГIабдуррахIманги,
АнсалтIа росдае мун хIадурарал,
Аллагь разилъаги нужедасаги.
Жегиги баркула, Мурад мугIалим,
ГIелму гьесда малъун къойил хIалтIулев.
Щуявго мугIалим, гьарула нужей
ХIасан ХIилми нижей хIадураралъухъ,
Щибаб гьас цIалулеб хIарп-хIарак рикIкIун,
Даражаби рорхун рохизареги,
ГIелмуялда бугеб щибаб хIарп рикIкIун,
Рохизе гьареги ахираталда.
Ахирги гьарила БетIергьанасда
Нилъерго росдае гьадинаб гьари:
АнсалтIа росдае Аллагьас кьеги
ХIасан ХIилми гIадал гIемерал васал.
Бищунго кIудияб баркала буго,
Дагъистанул муфти АхIмад афандий,
Гьалщинал мадрасал гIуцIарав дуе,
Алжаналда хъулби насиб гьареги.
