ЦIалдолезул пикраби
Газеталъул ахирисеб номералда кьун букIана «Рамазан моцIалъ кIал кквеялдаса кинал пайдаби нужее ккарал?» - абураб суал. Гьелъие рачIарал жавабал кьолел руго гъоркьехун:
ГIемерал пайдаби ккана. Гьезул бищун аслияб рогьалил как ахIарабго бай.
Черхалъул тIутIлъи. Квен гьабизе ургъел дагьлъана, цо нухалъ гьабуни гIола.
Араб Рамазаналдаса гьабжеги хирияб моцI бачIинегIан урхъун вукIана, щайин абуни гьалъулъ лъикIаб гуреб гIамал гьабизе ракIалде кколаро. Чорхое рахIат, мунагьаздаса цIуни, мискин-пакъирал рохи, гIадамазулъ яхI-намус цIилъи буго гьаб моцI.
Аллагьас гьабураб гIамал къабул гьабун батаги щивазул, тIадеялъулги баракатго разиго бачIаги.
Пайдаяб гуреб жого ккечIо. Аслияблъун букIана кванай дагьлъи, лъикIал гIамалазде гьеси.
Хадусеб номералъе суал «Сордо къоялда жаниб физкультураялде ай ччерх лъадариялде кигIан заман нужеца биччалеб?»
КIал кквеялъул пайдаби рицун гьанир рахъинаро. Саламатго къаркъала тIутIлъана, гIиси-бикъинал гIузраби тIагIана, гIорцIизегIан квен щоларезул хIалги бичIчIана. РухIияб рахъалъги рацIалъун ратиларищха. Масала вакъарав чиясе гIемер калам бокьуларо, кеп-гIоркьгун хочIалде гъира букIунаро. ИфтIаралде гIагарлъи божилъи данделъун ракIал журала гьеб моцIалъ. Гьединго росабазул, районазул, шагьаразул ва округазул бусурбаби данделъун гIуцIула исламиял мажлисал-ифтIарал гьарун лъикI тIобитIула заман.
ГIамалалъул квешлъиялъ ва гьабулеб гъибат-бугьтаналъ ракъи гурони тIокIаб пайдаго ккун батиларо.
ЖамагIатгун каказде хьвадизе байбихьана. Радал тагьажудал разеги вахъуна. Садакъа гIемер гьабуна. Кваназе гIагарлъи гьоболлъухъе ахIула. Аллагьас къабул гьабеги.
Сахаб лъагIелалъ балагьун чIун рукIуна хирияб шагьру рамазаналъухъ. ЛъикIаб гIамал жиндилъ гьабиялдалъун кири гIемер хъвалеб моцI буго гьеб. Закат-сахI бахъун боцIи-мал цIунулеб моцI. ИфтIаразде хьвадун цо хъизан гIадин гIодор чIолеб моцI. Щибаб санайил рохалида дандчIвазе хъван батаги.
Рамазан моцI байбихьаралдаса дица ният гьабуна къуръан цIалун рагIалде бахъинабизе. Гьале рамазан моцIалъул чанго къо хутIидал, дир Къуръан тIобанго цIалун бахъана.
Радал сухIуралде вахъун цинги ифтIар тIаде щвезегIан сахаб къоялъ кьижун инеб буго хирияб моцI.
БитIараб бицани унти сабаблъун кIал кквезе кIоларо дида, амма жеги цониги нухалъ гIадамазда цебе кIалдиб щибго лъечIо дица. Дир гIишкъу буго кIалал кквезе. Аллагьас кьеги киназего сахлъи.
Дие буго 10 сон. Исана 15 кIал ккун борчIана. Эбел-инсуцани абула диде жеги кIал кквезе гIун гьечIилаян. Амма дица кIвараб куцалъ ккола кIалал.
КIал кквеялъул пайдаби гIемерал руго. ГIалимзабаз хIалбихьиялдалъун чIезабуна 30 къоялъ тIатIала ккураб кIалалъ инсанасул сахлъи щулалъулин.
