«Рамазаналъ данде гьарула»

«Рамазаналъ данде гьарула»

Гьале тIаде щвана рамазан моцI. Гьеб буго муъминзаби жиб бачIиналъухъ балагьун чIун букIунеб моцI. Халкъалда гьоркьоб цIакъ машгьураб рагIи ккола «рамазаналъ данде гьарула» абураб калима.

ХIасан Амаханов,

лезги мацIалда бахъулеб «Ас-саламалъул» редактор

- Рамазаналъ гIадамал гIагар гьарула. Гьелъие хIужаги буго киназго цадахъ кIал ккун, цадахъ гьеб биччазе данделъулел рукIин. Гьединлъидал рамазаналъ киналго гIадамал данде гьарула.

Зульфия Ханнанова,

башкир мацIалда бахъулеб «Ас-саламалъул» редактор

- Рамазаналъ данде гьарула бусурбаби. Гьебги халлъула тIоцебесеб сухIуралдаго, дурго гIадин рокъоб бакараб чирахъ мадугьалзабазулги бихьидал. ТаравихIал разе данделъидал дуда лъала мунго гIадинал бусурбабиги таравихIалде данделъулел рукIин. Гьелъги ракIазе рахIат гьабула. Дун божарай йиго хирияб моцIалъ бусурбабаз жигар бахъилин лъикIал ишазе, хасго садакъа-хайраталъе. Бичасул авараг ﷺ гьаб моцIалъ цIакъго сахаватав вукIанин бугелъул.

Цоги, дир хьул буго тIолалго бусурбабаз гьаб моцIалъ Аллагьасда гьарун дугIа гьабилин дунялалда ругелщинал къварилъаби тIаса росагийин абун.

Барият МухIаммадова,

Буйнакск районалъул Манасаул росдал школалъул мугIалим

- Рамазан моцIалъ гIадамал мажгитазде гIемер уна, кIалал риччазе цоцахъе ахIула, нух-нухазда квен ва лъим бикьула, цо хасаб гьимигун цоцазда кIалъала. Гьеб киналъго асар гьабичIогоги толаро. Бицун хIалкIолареб нур чIун букIуна гьеб хирияб моцIалъ. Мадугьалзабаз, гIагараз, гьудул-гьалмагъзабаз хIеренаб бербалагьиялда рукIине жигар бахъула. Къокъго абуни, ракIазулъ иман щулалъула ва гьелдалъун бусурбабазда гьоркьоб цолъи ва вацлъи щулалъула.

МухIаммад Ражабов,

Миллияб политикаялъул ва диниял ишазул министерствоялъул хIалтIухъан

- Рамазаналъ гIадамазул ракIал данде гьарула. ТIубараб моцI буго вацлъиялъул ва Аллагьасе гIоло цоцалъ гьуинго рукIиналъул мех. Рамазаналъ нилъ ахIула цадахъал ифтIаразде, сухIуразде ва таравихIалъул какал раялде. Гьезул щибалъ ахIула цолъиялдегун ракълиде. Гьединлъидалин гIадамалги рамазан бачIиналъухъ балагьун чIун рукIунел.

ГIабдуллагь МухIаммадов,

магIарул мацIалда бахъулеб «Ас-саламалъул» редактор

- Рамазан моцIалъ киналго данде гьарулеблъи щаклъи гьечIеб жо буго. Гьеб бихьула рамазаналъул щибаб къойил. ИфтIаралда данделъиги, цадахъ квана-гьекъейги буго цIакъго дагьаб жо Аллагьас кьолел даражабазде дандеккун. Рамазан моцI буго ракъиялдалъун чорхол хIал бихьулеб ва къаси кванихъ щукру гьабизе тIамулеб мех.

Цересел соназ МахIачхъалаялда гIуцIун рукIана районазул ва шагьаразул цадахъал ифтIарал. Гьенир гIадин бусурбаби цоги бакIазда цоцада рихьулароанин абизе бегьула. Гьединго рамазаналъул баракат халлъула кIал биччалелъул нух-нухазда чIун ифтIаралде ахIулел гIолохъаби рихьидалги.

АхIмад ГIабдурашидов,

ДРялъул муфтияталъул дагIваталъул отделалъул хIалтIухъан

- Рамазан моцIалъ ракъи хIехьеялдалъун инсанасда рихьула ва ричIчIула гIемерал хIикматал. БетIергьанасде хIажалъи лъала, мискин-пакъиразул хIал бичIчIула. Гьел киналго руго халкъал данде гьариялъе ругел сабабал.

ГIазиз Мичигишев,

лъарагI мацIалда бахъулеб «Ас-саламалъул» редактор

- ТIоцебесеб иргаялда рамазаналъ данде гьабула тIубараб хъизам. Киналго данделъула сухIуралде, цадахъ бала рогьалил как. Гьединго киналго цадахъ данделъула ифтIаралдеги. Хадур таравихIал разе ракIарула мажгитазде. Гьел хIужабаз бицуна киналго данделъаразул цого хIал ва цого ният букIунеблъиялъул.

ГIадил Ибрагьимов,

гIурус мацIалда бахъулеб «Ас-саламалъул» редактор

- Рамазан моцI буго лъагIалида жаниб цо нухалъ дирго черхги рухIияб рахъги бацIцIад гьабулеб заман. Гьеб буго нилъеца нилъеего гIемерал суалал кьезе кколеб, нилъерго гIумруялда тIад ургъизе тIамулеб моцIги.

Аллагьасде хьулги буго гьеб моцIалъ киназго гIибадаталда тIадчIей гьабилин абураб.

Ибрагьим Ибрагьимов,

Новосибирскиялда бугеб мажгиталъул имам

- ХIакъикъаталдаги рамазаналъ халкъ данде гьабула. ТIолабго хъизам цо тIутIалда нахъа данделъула. Гьединго гIага-божарал цадахъ ракIарун гIуцIула ифтIарал. Данделъула мажгитазда гIибадат-дугIаялъеги.

ХIамзалав ХIамзалов,

ДРялъул мустахIикъав артист

- Рамазан моцIалъ ракI бацIцIалъула, диналъул вац-яцазда гьоркьоб гьуинлъи цIикIкIуна, хасго гьеб моцIалъ тIолабго пачалихъалдаго тIоритIулел ифтIараз цIакъго кIудияб пайда кьола иман щулалъиялъе ва бусурбаби цолъиялъе.

Дайтбек Сайпов, ДРялъул Халкъияб Собраниялъул депутат

- Дунялалъулго бусурбаби данде гьарула рамазан моцIалъ. Гьеб буго лъикIал гIамалазул, сахаватлъиялъул ва ракI бацIцIад гьабиялъул моцI.

Рамазаналъ данде гьарула цохIо бусурбаби гурелги цогидал миллатазул ва диназул вакилзабиги.