Байрахъалда гъоркь рукIина
Байрахъалда гъоркь рукIина
ТIадегIанав Аллагьас ﷻ Къуръаналда абун буго (магIна): «Нужехъе витIарав чапарас бачIараб жо босе нужеца. Гьес нахъчIваралдаса нахъчIванги чIа нуж», - илан (суратул «ХIашр», аят 7).
ТIадегIанав Аллагьасул ﷻ гурхIел-рахIматалъул гIаламатаздасан ккола нилъехъе Авараг ﷺ чапарлъун витIун дунял-ахираталъул талихI нилъеда гьес ﷺ малъи. Гьелдасан нилъеда бичIчIула ТIадегIанав Аллагьасе ﷻ нилъ Алжаналъуре лъугьинаризе бокьун букIин. Гьелдаго цадахъ Аллагьас ﷻ кьун буго нилъее эркенлъи бокьараб къагIидаялъ гьаб ракьалда хьвадизе. Гьеб хIалалда хьихьун руго Аллагьас ﷻ. Ризкъи кьолевги Гьев ﷻ вуго, сахлъи кьолевги Гьев ﷻ вуго, цIодорлъи кьолевги Гьев ﷻ вуго. Ракьалда гIадлуялда рукIине рижунги руго ва гIадлу малъун нилъехъе Аварагги ﷺ витIун вуго. Гьелде тIаде динги рещтIун буго нилъехъе бокьараб бакIалда, бокьараб заманаялъ, бокьараб низамалда гьелъул тIалаб тIуразаризе нилъехъа бажарулеб хIалалъ. Хирияв Аварагас ﷺ бачIараб босизе ва гьелда гIамал гьабизе хIаракат бахъулел чагIилъун рукIине ккола нилъ. Гьеб нух нилъеца ккуни, ахираталдаги Аварагасул ﷺ байрахъалда гъоркь рукIина, ин шаа Ллагь. Гьеб нух нилъеца тани, ахираталда жужахIалъуре ина.
ТIадегIанав Аллагьас ﷻ Къуръаналда абун буго (магIна): «Расуласул ﷺ амруялде хилиплъи гьабулел гIадамал хIинкъа жидеде дунялалдаго питна-балагь щвеялдаса яги ахираталда жужахIалъ гучаб гIазаб щвеялдаса», - ян (сурату «Ан-Нур, аят 63).
Гьаб ракьалда инсанасул тIагIамбахъиялъе гIилла сабаблъун батула гьабураб мунагь ва Аварагасдехун ﷺ гьабураб хилиплъи. Аварагасдаса ﷺ живгоги вокьун, бокьа-бокьараб гьабизе инсан лъугьин. Нужеца хIисаб гьабе, щиб сабаблъун гIадамал СПИДалъ унтулел ругел, кколел ругел аварияби, гIадамазда гьоркьоб питна-балагьал. Гьел киналго руго диналдехун хилиплъи гьабидал кколел балагьал. ХIатта, руччабазул каранда унти ккеялъе гIемерисеб мехалда сабаблъун кколеб буго лъимадуе гьей эбелалъ керен хахизе кьунгутIи. ТIадегIанав Аллагьас ﷻ гьей эбелалъе кьун букIуна лъимадул инсул ДНКялда, гьесул рагъа-рачариялда рекъараб рахь. Цинги лъимералъ хахидал инсул тIабигIат-гIамал гьесде бахуна. Нилъер заманалдайин абуни цо-цояз лъимер махIрум гьабулеб буго инсул тIабигIат-гIамал босиялдаса гьитIинго. Гьеб балагьги буго Аварагасул ﷺ суннаталда тIадчIей гьабизе инсан кIвахIаллъун, чIухIун вукIин.
Диналъ инсанасул рукIа-рахъиналъул кинабго рахъ жанибе бачуна. Цо-цоязда кколеб буго дин цохIо исламалъул щуябго рукну бугин ва гьеб цIунулел ругинги абун, хутIараб бидгIа бугинги дагIба бала. Амма хIакъикъаталдаги Авараг ﷺ кин кьижулев вукIарав, кин гIибадат гьабулеб букIараб, кин гIадамазулгун гьоркьоблъи тIубалеб букIараб, кинаб квен кваналеб букIараб ва гьелда релълъарал хутIарал пишабиги ккола нилъер диналдаса. Гьелда хилиплъи гьаби кколарищ бидгIа? Аварагасдаса ﷺ нилъ рикIкIалъаралгIан цоцаздасаги рикIкIалъулел рукIин бихьулеб буго жакъа нилъеда.
ТIадегIанав Аллагьас ﷻ Къуръаналда абун буго (магIна): «Аллагь рехсеялдаса, Гьесул Къуръан цIалиялдаса жив беццлъарав, гъапуллъарав чиясе Дица гьесда цадахъ даимго букIунеб шайтIан гьабула, жинца гьев кидаго вас-васазда, гъаплатазда чIезавулеб. Гьеб шайтIан гьесул гьудуллъун букIине буго, жиб кидаго гьесдаса батIалъулареб» (суратул «Зухраф», аят 36).
Инсанасул рекIелъа Аллагь ﷻ рехсей нахъе индал, гьесул рекIелъе шайтIан бачIуна. Цониги квешаб пиша гьабизе инсанасда ракIалде ккедал, аскIоб бахъун чIола шайтIан, гьесул рекIелъе вас-васал рехизаризе. Цинги гьелъ гьев гьесизавула гьеб квешлъи гьабиялде.
Аллагьас ﷻ нилъее киназего Алжаналъуре унеб гIамал гьабизе тавпикъги кьеги, Аллагьасдаги ﷻ Аварагасдаги ﷺ нахърилълъунел агьлулъунги гьареги, унтарал сахлъаги, хваразул мунагьалги чураги.
