ГIечалдаса къураб гьечIо
Гени буго витаминаздалъун бечедаб пихъ. Гьеб хIалтIизабизе бегьула дарудае, лъималазе каща гьабизелъун, компотал гьаризелъун, бежа-белъунеб кванилъе, салатазулъе. Абула гьелдаса пайда-хайир щвезе бокьун батани, хъал бахъичIого кванайиланги.
Индиялъул тохтурзабазгун гIалимзабаз кутакаб кIвар кьола гьеб нигIмат дарудае хIалтIизабиялде. Гьез абула кванда хадуб пихъал кваназе лъикIаб гьечIин. Кванан хадур 30 минут ине кколин пихъал кваназе ккани. Кьижилалде цебеги гени кваназе лъикIаб гьечIо. ЦIакъго хьул тIамулеб бугони, кванала дагьабго къадар.
Гьелъул хъалалъулъ буго инсанасул рекIеегун бидурихьазе пайдаяб кверцетин ва флавоноид абурал гIуцIаби. Гьез толел гьечIо бидурихьал жагъаллъизе, тамахлъизе, холестериналъул къадарги гIодобе ккезабулеб буго. Генуца кумек гьабула бидул кьаби рукIалида чIезабизе, инсульт ккунгутIизе. Гьелъулъ ругел антоцианаз ва тIулакьерал кислотабаз кумек гьабула гьуърузда, кванирукъалда, кIващул пунцIила гIадал бакIазда лъугьунел батIи-батIиял рак унтабаздаса цIуниялъе.
Генулъ буго бактериязда данде хIалтIулеб арбутин абураб вещество ва цIикIкIараб къадар калиялъул. Гьеб кIиябго цадахъ хIалтIула кIващул мухъазда лъугьунел инфекциязда дандеги.
Гени буго махI берцинаб гьуинаб пихъ. Гьуинлъи цIикIкIараб пихъ бугониги, диабет бугезе гIечалдаса гьеб гIемерго лъикIаб буго. Чакрил къадарги рукIалида чIезабизе кумек гьабула. Гьел унтаби ругезе лъикIаб буго багIараб кьералъул гени.
Цебе заманалда гени хIалтIизабулаан простатиталъе дарулъунги ва кьолаан макьил низам хварал чагIазе.
Витаминаздалъун бечедаб нигIмат букIиналъ гьелъул гьарурал кащал кьезе бегьула гIисинал лъималазеги.
Пайдаялдаго цадахъ заралги камуларелъул, гени гIемер кваназе лъикIаб гьечIо гастрит, язва гIадал унтаби ругез. Кваназе бегьуларо мачIикьангоги. Гьеб кванан хадуб лъим гьекъезе, гьан ва гьединалго рихIинаризе захIматал нигIматал кваначIого таниги лъикIаб буго.
