Нужеца гьездалъун ахIи бай

ТIадегIанав Аллагьас ﷻ Къуръаналда абулеб буго (магIна): «Аллагьасул ﷻ берцинал цIарал руго, гьел цIараздалъун нужеца Аллагьасда ﷻ гьаре», - абун.

Бухариясги Муслимицаги бицараб кьучIаб хIадисалда буго: «Аллагьасул 99 цIар буго, щив чи вугониги гьел цIарал рикIкIун, гьев Алжаналде лъугьина», - ян. ЦIарал рикIкIиналъул магIна цо-цо гIалимзабаз рекIехъе лъазаруниян абунги гьабулеб буго. Гьал хириял цIаразул магIнабиги лъани, кидаго гьел рикIкIунелги ругони, гьев чиясе Аллагь ﷻ вокьила, Аллагьасе ﷻ гьевги вокьила, ТIадегIанав Аллагьасул ﷻ кIодолъиги лъала. Аллагьас ﷻ тавпикъ кьеги нилъее кидаго гьел рикIкIине.

1. Аллагьу

- гьаб ккола Аллагьасул ﷻ бищунго кIудияб цIар, Аллагь ﷻ тун батIиясда лъураб цIарги гуро. Гьеб ккола 99 цIар жанибе бачараб Аллагьасул ﷻ хирияб заталда хасаб цIар.

2. Ар-РахIману

- гурхIел-рахIмат гьарзаяв, ай кинабго жоялъе Жиндир рахIмат-гурхIел гIатIидав. Гьебги Аллагь ﷻ гуресда лъураб цIар гуро.

3. Ар-РахIиму

- нигIмат-цIоб даимав, жиндир рахIмат тIагIунарев.

4. Аль-Малику

- ханзабазулги хан, къиямасеб къоялъул хан, хIакъикъияб ханлъи Жиндие гурони гьечIев.

5. Аль-Къуддусу

- вацIцIадав, киналго гIайибаздаса, гIунгутIабаздаса Жив вацIцIадав, гIакълаби нахъгIунтIиялдасаги Жив вацIцIадав.

6. Ас-Саламу

- халкъалда гьоркьоб салам тIибитIизабулев, киналго гIайибаздаса, мукъсанлъиялдаса, паналъиялдаса Жиндир зат бацIцIадав.

7. Аль-Муъмину

- гIазабалдаса Жиндир вализаби хвасар гьарулев, лагъзадерие гьабураб къотIи ритIухъ гьабулев.

8. Аль-Мугьаймину

- Жинца халкъ цIунулев, гьелда тIад хъаравуллъи гьабулев, халкъалъул гIамалал, ризкъаби, ажалал рилълъанхъизарулев, халкъ хьихьизе, цIунизе тIаде босарав.

9. Аль-ГIазизу

- тIадегIанлъи Жиндие хасав, бергьарав, сунцаго квегъуларев, къуватав, Жиндаса щибго жо бергьунарев, Жив сундасаго бергьунев.

10. Аль-Жаббару

- Жиндие бокьараб лъугьунев, Жиндир хIукмуялдаса щибго жо борчIуларев, бокьараб жоялъе халкъ квегъулев.

(Хадусеб букIине буго)

ШАМИЛ МУХIАММАДОВ