БетIер бугони тIагъурги

БетIер бугони тIагъурги

Гьаб заманалда гIолохъабазда гьоркьоб модалъун гIадин лъугьун буго бетIералда тIагъур лъечIого хьвади. ЦIакъаб жо гьабулеб гIадин чIухIунги рукIуна гьел. Мегежги тун, тIагъурги лъечIого хьвадулев чиги лъида релълъуневали нужго ургъе. Гьединал диналъул вацал кантIиялде хьулгун хъвараб буго гьаб назмуги.

Диналъул вацазе тIагъур бокьизе
Рокьул сабаб хъвани щибдай букIина?
Гъоркь далараб мегеж - тIад гIицIаб бетIер,
Лъида нилъ релълъарал, ле, гIолохъаби!

Къавмалда релълъарав гьездасан кколин
Хирияс абураб кIочонищ тараб?
ТIагъур лъезе ккани бетIер шартI букIин,
Щивасда жиб лъалеб балъголъи буго.

ГIарабаз ботIрода ххам жеманиги
Чалма лъугьунеблъи лъалищ нужеда?
Нилъер умумузги бурутI-хухги хъун
Хъурайсин-тIагъур лъуна ботIрода.

Цо гIалимас абун бугин рагIана,
ГIицIаб бетIергун къватIив вахъани
Зобалаз ботIролъа гIакълу унила,
Жаниса иманги цIцIан бахъулила.

Хасго хIажатханалда ботIрода гIицIго
Жаниве лъугьине цIакъ какун буго.
Нуж киналго лъикIал рукIиналъеги
Дир нугIлъиги буго, АлхIамдулиллагь.

ЛъикIалазе хасго ками бегьилищ,
Балъго ургъун рихье, дидаги бице.
ТIурачIел ругилан хIукмуги гьабун
ШаригIаталъ нугIлъун нуж росуларин.

Гьаб дир каламалъги асар гьабичIев,
Асир вугин тела напсгун шайтIадул.
Нагагь нуж кантIани, дунги вохарав,
Диеялдасаги нужейги лъикIаб. 

ХАЛИДАСХIАБ МАМАТХАНОВ