Бича-хиси гьарзалъи

Абугьурайратица аварагасдасан ﷺ бицана: «Питна тIибитIун, гьереси гIемерлъун ва базарал гIагарлъун гурони къиямасеб къо щвеларо», - ян («Муснад», АхIмад).

Къиямасеб къоялъул загьирлъарал гIаламатаздасан ккола базарал гIагарлъи, ай бокьухъе бича-хиси гьабизе рес букIин. Цере бича-хиси гьабизе варанабаздаги рекIун, чанго къойил манзилалъ ине кколел рукIана. Заман анагIан, экономика цебетIедал, телефонал, компьютерал ва интернет баккидал, щивав чиясул рес буго рокъовги вукIун бокьараб жо интернеталдасан босизе. Амма къиямасеб къоялъул гIаламатал кидаго гуро квешал рукIунел. ТIадеги, бича-хиси гIемерлъидал гIадамазе гьелъулъ бигьалъаби руго. Масала, базарал гIагарлъиялъеги лъабго аслияб гIилла буго.

ТIоцебесеб – къайиматIахIалъул багьа-къадаралъул баян хехго тIибитIи. Цо бакIалда къайиялъул багьа учузаблъун ялъуни багьаяблъун бугони, гьелъул хIакъалъулъ хехго лъала киназдаго.

КIиабилеб – къайи хехго босулесухъе щвей. Бича-хиси ва къотIи-къаял гьаризе манзилалъул захIмалъаби гьанже гьечIо. Къайи баччулеб техникаялъул цебетIеялъ рес буго дунялалъул бокьараб рахъалде къайи хехго битIизе.

Лъабабилеб – конкуренция гIемерлъиялъ къайиялъул багьа цо мухъде бачIин.

КАМИЛ МУХIАММАДОВ