Муъминзабазда ритIарал макьаби рихьи
Абугьурайратидасан бицана аварагас ﷺ абунин: «Къиямасеб къо тIаде гIагарлъидал иман лъурав чиясул макьу битIараблъун букIине буго. Гьереси бицунарел чагIазул макьабиги цIикIкIун ритIухъал рукIине руго. Муъминчиясул ритIухъаб макьу – авараглъиялъул 45 бутIа гьабун цо бутIа буго», - ян. (Бухари, Муслим)
Ибн Абу Жамратица абуна: «Къиямасеб къо гIагарлъиялда аскIоб макьаби ритIухъал рукIине ругин аби ккола, гьереси жаниб букIунгутIиялъ гьел макьабазул магIна гьабизе ккезе гьечIин абураб. Гьелде щвезегIан макьабазе баян гьабулаан ва баян гьабулев чи мекъи ккезе рес букIана. Гьеб магIнаялда макьаби гьересияллъун рукIине рес букIана», - ян.
Ибну ХIажарица «Ал-ФатхI» тIехьалда баян гьабуна щай хасго къиямасеб къо гIагарлъидал макьаби ритIухъаллъун рукIине ругелали. Гьес абуна: «Гьеб заман тIаде щведал иман лъурал гIадамал цIакъго дагьал рукIине руго. РитIухъал макьаби гьезие рухIияб квербакъилъун букIине буго», - ян.
Гьеб заман щиб мехалда букIине бугебилан абураб суалалда тIасан гIалимзабазда гьоркьоб хилаф буго. Цояз абула, гIадамазухъа гIелмуги нахъе босун жагьлу тIибитIараб заман бугин. Гьеб заманалъул гIадамал релълъуна авараг ﷺ витIилалде рукIарал гIадамазда. Гьел гIадамал цIакъ хIажат рукIине руго насихIатазде. Гьединаб кумеклъун ритIухъал макьаби рукIина гьезие. Гьедин абуна Ибну ХIажарицаги.
Цогидал гIалимзабаз абуна, гьеб бугин иман лъурал гIадамал цIакъго дагь рукIине ругеб ва жагьилчагIигун къосарал гIадамал цIакъго гIемераб заман. РитIухъал макьаби иман лъуразе квербакъилъун рукIина. Гьеб пикруялда Ибну Жамратги тIадрекъана.
Лъабабилез абуна, гьеб ГIиса аварагасул заман бугин. Гьеб заманалда гьесда нахърилълъаразул тIоцересел гIадамазулги макьаби ритIухъал рукIанин абун.
