Дуца кьуни, дуеги кьола
Дуца кьуни, дуеги кьола
БетIергьан Аллагь ﷻ вуго сахаватав, квер биччарал гIадамал рокьулев. Жидер бугеб чидае кьолезде Гьес ﷻ баракат чваххизабула, рукIа-рахъиналъе гьабулеб пишаялъулъ бигьалъиги кьола. Къарумал, хъантIарал гIадамал Аллагьасе ﷻ рихарал руго, гьезул боцIи-мал гIемер бугониги, баракат гьечIеб букIуна, гьабулеб магIишатги захIмат бихьараб букIуна. Сахаватлъи ккола бусурбанчиясул тIабигIатазул бищун цебесеб, хIатта гьеб буго Аллагьасул ﷻ сипатазул цояб.
Къарумал какун, сахаватал реццун бачIараб хIадисалда буго: «Сахаватлъи буго жиндир кьалбал Алжаналдаса ругеб гъветI. Гьеб гъотIол гIаркьалабазда хурхин тIалаб гьабурав Алжаналде лъугьинчIого чара гьечIо. Къарумлъиги буго гьебго гъветI, жиндир кьалбал жужахIалъур ругел. Гьелъул гIаркьалабазда хурхин тIалаб гьабуравги ахир-къадги жужахIалде ккола», - абун (Байгьакъи).
Хирияв Аварагас ﷺ абун буго: «Алжан сахаватал гIадамазул рукъ буго», - ян. Садакъа кьеялда сахаватлъи бихьизабиги балъго гьабизе цIакъго хирияб буго. Ибну ХIибаница бицараб хIадисалда буго: «Балъгояб садакъаялъ Аллагьасул ﷻ ццим бахъин свинабула, гIагарлъи хурхинабиялъ гIумру халат гьабула, Аллагьас ﷻ амру гьабураб гьабиялдалъун балагьаздаса цIунула», - ян. Цогидаб хIадисалда буго: «Аллагьас ﷻ мунагьал чури тIад гьабулеб жоялдасан ккола: мискинасе тIагIам кьей, гIадамазда гьоркьоб салам тIибитIизаби ва берцинаб калам гьаби», - ян.
Жакъа дунялалда рукIаго нилъее бугеб цоги талихIалдасан буго, хвараб къоялдеги батулеб, хведалги гьоркьоса къотIулареб, садакъатун жарият гьаби. Гьебги буго нух гьаби, кьо бай, мажгит-мадраса гIадаб жамгIияб бакIалде садакъа гьаби, Аллагьасул ﷻ нух ккураб наслу нахъе тей. Гьел гIамалал руго, нилъ хваниги, жал хIалтIизе ругел, кири бачIинги гьоркьоса къотIизе гьечIел пишаби.
Лъазе ккола нилъеде цогидазул бугеб хIажат Аллагьасул ﷻ рахъалдасан нилъедехун бугеб тIадкъай букIин. Щайин абуни, жакъа нилъехъ бугониги гьеб кколелъул Аллагьасул ﷻ буголъи ва лъикIалъе хIалтIизабизе нилъее рес щвараб.
Сахаватлъи жиделъ бугезул лъимал-хъизанал Аллагьас ﷻ балагьаздаса цIунула, квен-тIехалда, буголъиялда баракат лъола, хIажат гьечIел чагIи рикIкIад гьарула, халкъалда гьоркьоб къадру-къимат бахинабула.
