Кири бокьани…
Кири бокьани…
ГIадамазда гьоркьоб маслихIат гьабиги гьел рекъезариги буго кири бугеб иш. Гьелъулго гIаксалда, гьезда гьоркьоб тушманлъи бижизабиги буго кIудияб мунагь бугеб, хIарамаб иш. Къуръаналдаги хъван буго лъикIлъи гьабизе нуж гIедегIейин, ай цоцаздаса цере ккезе хIаракат бахъейин.
ГIадамазулгун хIал рекъезабулев чиясеги щола шагьидасул даража. Щай абуни, гIадамазда хIал рекъезаби, аварагзабазулги сиддикъуназулги тIабигIатаздасан букIун. ТIадегIанав Аллагьас ﷻ жужахI хIарам гьабулеб буго гIадамазе бигьаяв, хIеренав ва тамахав чиясе. Амма гьел тIабигIатал гIаксалда ричIчIизе бегьуларо, ай гьев хIинкъарав чи вугилан абун. Гьеб буго гIаданлъи жиндилъ бугин абураб магIна. Аварагасулги букIана рагIа-ракьанде щвараб хIеренлъи. АсхIабзабаз дунялалъул бицараб мехалъ, дунялалъул бицунаан, гьез ахираталъул рехсей гьабидал, ахираталъулги бицунаан, квен-тIехалъул бициндал, кванилги бицунаан.
Цо-цо асхIабзабаздасан бачIана микьго жо гьабизе гIажизлъарас тIадчIей гьабейин микьго жоялда абун:
- Кьижун вукIаго тагьажудалъул какил кири щвезе бокьарас къад къоялъ мунагь гьабуге.
- КIал кквечIого суннатаб кIалалъул кири бокьарас жиндирго мацI цIуне.
- ГIалимзабазул ажру бокьарас пикруялда тIадчIей гьабе.
- Рокъов вукIаго гъазаваталъул кири бокьарас шайтIаналда дандечIей гьабе.
- ХIежалде ине рес гьечIони ва гьелъул кири бокьарас рузманалда тIадчIей гьабе.
- Садакъа кьезе рес гьечIони ва гьелъул кири бокьани дудаго лъараб гIелму малъе гIадамазда.
- ГIабидуназул хиралъи бокьарас гIадамал рекъезаре ва гьезда гьоркьоб тушманлъи гьабуге.
Анасидаса бицун бачIана: «КIиго чиясда гьоркьоб маслихIат гьабурасе, Аллагьас ﷻ кьола гьениб бицараб лъикIаб щибаб рагIиялъухъ лагъ тархъиялда бащадаб кири», - ян.
ГIадамазда гьоркьоб маслихIат гьаби буго авараглъиялъул гIаркьалабаздаса цо гIаркьел. ГIадамазда гьоркьоб тушманлъи гьабиги буго сихIруялъул гIаркьалабазул цо гIаркьел.
АвзагIияс абуна: «Аллагьасе ﷻ рокьулел галабаздасан ккола маслихIат гьабизе рахъарал галаби ва кIиго чиясда гьоркьоб маслихIат гьабурав чи Аллагьас ﷻ цIунула жужахIалъул цIаялдаса», - ян.
ГIадамазулгун хIал рекъезабиялъ цIикIкIинабула рокьи-хинлъи ва гьел цоцадаса ратIалъизеги риччаларо. МацI гьабулев чиясул кинабго гIаксалда букIуна ва гьев кидаго Аллагьасул ﷻ ццим бахъиналда гъоркьги вукIуна.
