Аллагьасе ﷻ гIоло рокьизе ккола
Аллагьасе ﷻ гIоло рокьизе ккола
Нилъер умматалъе кьурал хиралъабаздасан ккола жиндир диналъул вац Аллагьасе ﷻ гIоло, цоги батIияб мурад гьечIого вокьиялъухъ нилъей щолеб хиралъи ва кIодолъи.
Аварагас ﷺ абун буго: «Лъабго пиша жиндилъ бугесда иманалъул гьуинлъи батула: 1) цогидабщинаб жоялдаса Аллагьги ﷻ Аллагьасул ﷻ Расулги ﷺ жиндие вокьи; 2) диналъул вац Аллагьасе ﷻ гIололъун вокьи; 3) куфру рихин, Аллагьас ﷻ жив гьелдаса хвасар гьавун хадуб цIадаве рехи рихунеб гIадин». Аллагьасе гIоло цоцаде рокьа-хинлъи гьабулел чагIазде Гьес ахIулила Къиямасеб къоялъ: «Кир ругел дие гIоло цоцазе рокьулел рукIарал чагIи, Дир гурони рагIад гьечIеб къоялъ», - ян.
Аллагьас ﷻ Къиямасеб къоялъ ГIаршалъул рагIдукьги чIезарулила гьел. Хирияб хIадисалда буго: «Анкьго чи вуго Аллагьас ﷻ Къиямасеб къоялъ ГIаршалъул рагIдукь чIезарулел. Гьездасан ккола Аллагьасе гIололъун жал цоцазе рокьулел кIиго муъминчи, гьеб рокьиялда жал данделъулел ва гьебго рокьиялда жал ратIалъулел», - ян.
ХIакъикъаталдаги диналъул вац Аллагьасе гIоло вокьулев чи гьев мустахIикъав вугила Аллагьас ﷻ жиндирго рахъалъан рокьи загьир гьабун чапар витIизе, гьедин хIадисалдаги абун буго. Жинда свалат-салам лъеяв аварагас абун буго: «Цо чияс зиярат гьабун буго цоги росулъ вугев жиндирго диналъул вацасухъе. Аллагьас витIулев вуго малаик гьев унеб нухде, гьесде данде. Гьесде аскIове щведал малаикас цIехолеб буго:
- Мун киве унев вугев, - илан абун.
- Дун унев вуго дирго вацасухъе зияраталъ, пуланаб росулъе, - ян жаваб кьолеб буго нухлулас.
- Гьес кьезе кколеб цониги жо бугищ дуе?
- ГьечIо, кинниги дие гьев вокьула Аллагьасе гIоло.
Цинги малаикас абулеб буго жив вугила Аллагьасул ﷻ рахъалдасан витIарав чапар, Аллагьасе ﷻ мун вокьулила дуе гьев лагъ Аллагьасе ﷻ гIоло вокьулев гIадин», - ян.
Гьелда релълъараб цоги хIадисалда буго: «Ва гьал гIадамал, нуж гIенекке ва нужеда бичIчIа! Аллагьасул ﷻ руго лагъзал, жал аварагзабиги шагьидзабиги гурел, амма гьезул Аллагьасда ﷻ аскIоб макъам-даража бихьидал, аварагзабазулги шагьидзабазулги гьездехун хIал хъублъулел, ай гьеб даражаялде хьул лъолел. Цинги цо гIалхул гIарабияс абунила: «Я Аллагьасул ﷻ Расул ﷺ, щал гьел гIадамал, аварагзабиги шагьидзабиги жидер макъамалъухъ гIащикълъулел, гьезул сипат гьабе нижее», - абун. ГIалхул гIарабиясул суалалъ авараг ﷺ вохизавунила, цинги абунила: «Гьел руго батIи-батIиял къапилаялъул гIадамал, жидеда гьоркьоб гIагарлъиги гьечIел. Амма жал Аллагьасе ﷻ гIоло цоцазе рокьулел, Аллагьас ﷻ къиямасеб къоялъ гьезие лъола нуралъул минбарал, гьелда гIодорги чIезарула, гьезул гьурмалги ретIелги нурлъун гьабула. Къиямасеб къоялъ гIадамал хIинкъула, амма гьел хIинкъуларо. Гьел руго Аллагьасул ﷻ вализаби, гьезие хIинкъи ва пашманлъи гьечIо», - ян. Аллагьас диналъул вацазда гьоркьоб рокьи-махIабат цIикIкIинабеги. Амин!
