Алжанги аварагги ﷺ
Алжанги аварагги ﷺ
Юсуфу Набгьанияс жиндирго «Афзалу салават» абураб тIехьалда хъвалеб буго: «КIудияв гIалим ибну Мубаракида гьикъула щай салаваталъ алжан гIатIилъизабулебин, тасбихIалдалъун ва цогидал азкараздалъун гьабичIого. Гьелъие ибну Мубаракица жаваб кьола: «Алжан хас гьабун салаваталъ гIатIилъула алжаналъул аслу нуралдалъун бижун букIиналъ. Алжан аварагасухъ ﷺ урхъун букIуна, вас инсухъ урхъун вукIуневго гIадин. Гьелда аварагасул ﷺ цIар рехсолеб рагIидал, гьеб бохула ва гIатIилъула. Авараг ﷺ ва гьесул уммат алжаналде лъугьиндал, гьеб бохула ва гьезие гIатIилъула», - ян.
Гьединго ибну Мубаракас абуна: «Аллагьасе бокьун букIарабани Алжан дунялалде бачIинабулаан аварагасухъе. Гьев аралъуве ине. Кинниги ТIадегIанав Аллагьасе ﷻ бокьичIо гьеб ракьалде, аваргасухъе битIизе. Щайин абуни, нилъеца Алжан бихьичIого иман лъезе букIине», - ян.
Авараг ﷺ ва гьесул уммат Алжаналъуре лъугьиндал гьеб цIакъ бохула ва гьезие гIатIилъула. Гьелъул рохел букIунила бицине хIалкIолареблъун.
Имам Факигьаниясдасан имам Сахавияс бицана: «Аварагасе ﷺ салават Аллагьас ﷻ хас гьабун кьуна, цогидал аварагзабазе кьечIого. Къуръаналда ва цогидал бакIазда бихьичIо цогидал аварагзабазе гьеб кьунин абураб магIна», - ян.
ТIадегIанав Аллагьас ﷻ Къуръаналда Жинцаго рехсана ва амру гьабуна гьесде ﷺ салават цIалеян. Хадуб малаикзабазги салават цIалана. Гьелъ гьесул макъам тIадегIан гьабула цогидал аварагзабаздаса.
Имам Сахавияс абуна гIалимзаби тIад рекъанин, ай ижмагI бугин гьеб аяталъ гьесул къадру-къимат тIадегIан гьабунин цогидал аварагзабаздасанилан абураб каламалда.
Аварагасул ﷺ макъам кутакалда кIудияб буго. Гьесда нахърилълъине ва вокьизе тавпикъги кьеги нилъее.
