Алжан насиблъеги ХIамзатие
Аллагьасул нигIматал руго нилъеда щукру гьабизе ракIалдего щоларел. Гьединал нигIматаздасан ккола нилъеда аскIор ругел диналъул вацалги, гьудул-гьалмагъзабиги, цадахъ хIалтIулелги, агьлу-хъизанги, гIагарлъиги. Нилъеда сверухъ бугебщинаб, ай рухI бугебги гьечIебги, кинабго буго Аллагьас нилъее кьураб нигIмат.
Гьединго Аллагьас диеги цогидазеги кьураб кIудияб нигIмат букIана дир хирияв диналъул вац, цадахъ цIаларав, цадахъ хIалтIарав, чанги кумекалъе ватарав Хlайбулаев ХIамзат - ШототIа росдал имам.
Инсанасе дунялалда я ахираталда жиндаса Аллагь разилъиялдаса кIудияб рохелги талихIги гьечIо. Гьединлъидал Аллагьасул авлияазги абула, муридзабаздаги малъула: «Я дир Аллагь, Мун вуго дир макъсуд (мурад, ай Мун лъай, магIрифат), Дур разилъиги буго дица тIалаб гьабулеб (дие щвезе бокьараб макъам)», - ян. Аллагь разилъи буго алжаналда вугесеги тIадеги алжан гIадинаб макъам.
ХIамзатги вукIана гьединавго, щукру бугев, Аллагь разилъи гурого мурад гьечIев, гIелму-гIамал рекъарав гIолохъанчи.
Чиясе мустахIикъаб къимат кьезе цIакъ захIматаб иш буго. Амма ХIамзатие къимат кьезе ккани, гьев лъалев чияс киданиги бищун лъикIаб гурони къимат кьоларо.
ХIамзат гIезавуна эбелалъ. Школа лъугIидал ЧIикIаб, СагIид-афандиясул цIаралда бугеб ДТИялда анкьго соналъ цIалана. ГIамал-хасият берцинав, инсанасул адаб гьабулев чи вукIана гьев.
2019 соналъ, цIалун вахъиндал, хIалтIизе лъугьана росдал имамлъун. ТIадкъараб жо гьес мухIканго тIубазабулаан.
24 июлалда Аллагьасул къадаралде щвана гьев. Аллагь гурхIаги гьесдаги гьесул агьлуялдаги. Гьединав бахIарчи гIезаюрай эбелалъеги гIумруги кьеги, Аллагьги разилъаги. Нахъе ругезе сабруги кьеги.
