Камилаб хIежгун гIумраялъул даража
Камилаб хIежгун гIумраялъул даража
ХIурматиял бусурбаби. БетIергьан Аллагьас нилъее гIемерал ресал кьун руго гIибадат гьабизе. Нилъее щолеб кири цIикIкIине букIинелъун рихьизарун руго хириял гIужал ва бакIал. ГIужалги ккола - ражаб, шагIбан ва рамазан, мухIаррамалъул тIоцебесеб анцIго къо, рузман сордогун гIидалъул сардал. Хириял бакIал руго лъабабго хирияб мажгит, гьелда хадур цогидал киналго мажгитал.
ХIарамалъул хирияб ракьалде кидаго ун чиясухъа гIемер бажаруларо. Нилъеда бажарулеб жо буго хириял гIужазда хадуб хъаравуллъиги ккун, мажгитазде хьвадиялда тIадчIей гьабизе. Хасго рогьалил какде хьвадиялде цIикIкIараб кIвар кьезе. Гьелъ щибго квалквалги гьабуларо дунялалъул цогидал хIалтIабазе. Рогьалил как жамагIаталда баялъул хиралъиялъул гIемер бицана. Гьаб макъалаялда бицен гьабизе бокьун гьелда хурхараб цогидаб рахъалъул.
Имам Тирмизияс бицараб хIадисалда буго: «Рогьалил как жамагIаталдаги бан, бакъ баккизегIан Аллагь рехсолев мажгиталдаги чIун, кIиго ракагIат бани, гьеб релълъуна хIежгун гIумра камилго, камилго, камилго гьабиялда», - ян. Имам Муслимица бицараб хIадисалдаги буго, Бичасул авараг ﷺ рогьалил как бан хадуб лъикIго бакъ баккизегIан гIодов чIолев вукIанин абун.
Балагьеха, бусурбаби, бугищ гьеб иш гьедигIанго захIматаб? Хасго гьаб сордо гьитIинаб заманалда бакъги хехго баккула, зухIа базегIан мажгиталда чIани, гьарулел вирдалги берцинго тIурала, игIтикафалъул кириги щола. Нилъеда гьоркьор гIезегIан рукIуна хIалхьиялда ругел, ригьалде рахарал гIадамал, гьединго, радалго рахъун хIалтIуде ине кколарелги. Гьединазе ва цогидазе хIежгун гIумра гьабиялъул кири рокъорги рукIун босизе киса щолеб жо букIунеб?
Имам Бухарияс бицараб хIадисалда буго: «Как бараб бакIалдаго чIарасде гьесул какичури биххичIебгIан заманалда малаикзабаз гьадинаб дугIа гьабула: «Я, Аллагь, гьесул мунагьал чуре, гьесдаги гурхIа», - ян.
Имам АхIмадица бицараб хIадисалда Бичасул аварагас ﷺ абулеб буго: «Бакъ баккизегIан Аллагь рехсолев, такбир, тахIмид, тасбихI, тагьлил бачунев вукIине цIикIкIун бокьила дие ИсмагIил аварагасул наслуялъул кIиго яги жеги цIикIкIун лагъ тархъиялдасаги…», - ян.
Гьаб цебе рехсралдаса нилъее баянлъана щибго гIакъуба бихьичIого, гIемераб гIарац харж гьабичIого хIежгун гIумраялъул кири, рогьалил какдаса зухIа базегIан мажгиталда чIаралъухъ БетIергьанас нилъее кьолеблъи.
Аллагьас тавпикъ кьеги лъаралда гIамал гьабизе!
