Аллагь ﷻ рехсеялде ахIула
Аллагь ﷻ рехсеялде ахIула
ХIурматияб диналъул агьлу. Бичасул Аварагас ﷺ нилъее тун буго бечедаб рухIияб ирс. Хирияб хIадисалда буго: «Дир нафсалъул кверщел кодоб бугев Аллагьасдалъун дун гьедила, нужее бокьани. Бищунго Аллагьасе жиндир лагъзадерида гьоркьор рокьулел чагIи ккола Аллагь Гьесул лагъзадерие вокьизавулел ва Аллагьасе Гьелги рокьизарулел, насихIаталдалъун ракьалдаги хьвадулел», - ян.
«РимахIу хIизби ррахIим» абураб тIехьалда буго, Бичасул Аварагас ﷺ рехсей гьабурал гIадамал шайихлъиялъул даражаялда ругел кколин абун. Щайгурелъул шайихас, ай тIарикъаталъул устарас Аллагь вокьиялде рачуна Аллагьасул лагъзал, гьединго Аллагьасе жиндир лагъзал рокьиялдеги рачуна. Кинин абуни, устарас мурид вачуна ва тIовитIула Бичасул Аварагасда ﷺ нахъвилълъине, гьесда нахъвилълъарав Аллагьасеги вокьула.
ХIакъикъаталдаги тIарикъаталъул устарзабаз гIадамал ахIула гIемер Аллагь рехсеялде. ГIемер рехсанагIан Аллагь вокьиги цIикIкIуна. Инсанасе Аллагь вокьи цIикIкIиналъул къадаралда Аллагьасе гьев лагъги вокьула.
Абу Сулаймани Даранияс абун буго: «Бищунго хирияб гIамал ккола Аварагасул ﷺ суннаталда кинабниги хIалалъулъ нахъвилълъин. Гьединаб нахъвилълъинги лъугьунаро гIибадат гьабиялъул нухазул цоялде, ай тIарикъаталде лъугьун гурони. Гьебги Бичасул Аварагасда ﷺ, асхIабзаби гьоркьор ккун, гьездасан тасавуфалъул машаихзабазул гьоркьоблъиялдалъун бугеб букIине ккола», - ян.
ГIубайдуллагьил АхIрарас абун буго, вализабазул рагIаби росарал ругила авараглъиялъул хIакъикъаталдаса. Къуръангун хIадис кIодо гьабизе тIадаб бугебго гIадин умматалдаго, гьединго тIадаб буго авлияазул калам кIодо гьабизегиян.
