Аварагас ﷺ кванана
Аварагас ﷺ кванана
Бичасул аварагас ﷺ кванана: – Бакъвараб гьан. Хирияб хIадисалда буго: «Цо чияс бицана, авараггун ﷺ сапаралда вукIаго гьесие хъуна чахъу. Цинги аварагас абуна гьелъул гьанал гIадлу гьабе, бакъвазабеян. Мадинаялде щвезегIан гьеб чахъдал гьан кьуна Бичасул аварагасе ﷺ», - ян.
– Зебраялъул гьан.
– Чахъдал гьан.
– Бихьинаб вараниялъул гьан, сапаралдаги рокъов вукIагоги.
– ГIанкIил гьан.
– Ралъдал рухIчIаголъабазул гьан.
– Сарид. Гьеб ккола гьанал гIагIуги чедги жубараб жо. Цо-цо мехалъ гьелда гъорлъ гьанги букIуна.
– Зайтуналъул нахалдаги ччун, чед. ГIумар ибну ХатIабидаса бачIараб хирияб хIадисалда буго Бичасул аварагас абунин: «Нужеца зайтуналъул нах кванай, черхалдаги бахе, гьеб буго баракатаб гъветI», - ян.
– Белъун пурчIина.
– Хазират. Гьеб ккола гIисин гьабун гьанги буссун, гIемераб лъимги тIун, белъиндал гъорлъе ханжуги бан, белъараб тIагIам.
– Нисо.
– ГIатIгояб, бакъвараб ва жеги тIубан барщичIеб чамасдак.
– Кабас. Гьеб ккола Арак гъотIол пихъ. Гьелъул кьибилалъул гьабула сивакги.
– ХIан. Бичасул аварагасе ﷺ Табукалдаса битIун хIан бачIана. Цинги аварагас ﷺ, нусги бачIинабун, бисмиллагьги бахъун, гьеб къотIана.
– КъанцIа. Ибну ГIабасидасан бицараб хIадисалда буго: «Макка бахъараб къоялъ Бичасул авараг ﷺ Умму Гьаниил рокъове лъугьана. Вакъунги вукIана. Хирияс ﷺ гьелда гьикъана кваназе жого гьечIищилан абун. Бакъварал чадил кескал гуреб кваназе жо гьечIин, гьел цере лъезе жийги нечон йигин абуна гьелъ. Цинги аварагас ﷺ абуна, росейин гьел церейилан абун. Гьелъ, лъелъги лъун, рекун, тIаде цIамги щван, рачIана. Цинги аварагас ﷺ гьикъана дандежо гьечIищилан. КъанцIа гуреб жо гьечIин жаваб гьабуна гьелъ. Цебе босун къанцIа бачIиндал, гьеб чадиде тIаде тIуна Бичасул аварагасﷺ, гьелъие реццги гьабуна, рокъоб къанцIа бугев чи пакъирлъиларинги абуна».
(«Васаилул вусул ила Шамаили Ррасул»)
