Балагьаздаса цIунулеб
Балагьаздаса цIунулеб
Инсанас дунялалда гIумру гьабулебгIан заман ккола БетIергьанас гьесул хIалбихьулеб мех. Гьесул сабруги, иманги, таваккалги, Аллагьасде ﷻ тIамун тейги борцине батIи-батIиял тайпабаздалъун балагьула гьесул щулалъиялъухъ. Гьединал хIалбихьиялги ккола мискинлъи, ракъи-къеч тIаде биччай, унти, гIагарлъиялъ рехун тей, магIишат гьабизе захIмалъи, жундуз кквей, сихIру-хIасадалдалъун зарал ккей ва гьел гурелги.
Инсан гьел захIмалъабаз сверун ккун вугевго гIадин, Аллагьас ﷻ гьесухъе кьун руго живго цIунулел яргъил хIисабалда ругел алаталги. Гьебги ккола исламияб нух щулаго кквей.
Лъиего балъгояб жо гуро, кодоб ярагъгун, живго цIунизе кигIанги ресал ругев чи, щибго гьебги хIалтIизабичIого живго гьалаглъиялде тIамуни, гьев хвасарлъуларевлъи. Гьелъие мисаллъун бачине бегьула гIадамазул гьадинал гIузраби: дие магIишат битIулеб гьечIо, дунялалъул битIго гьечIо, лъимал квешал лъугьун руго, чорхолъа унтиго унеб гьечIо, сихIруялъ тIагIам толеб гьечIо, жундуз санагIат бахъун буго, гIибадаталде черх цIалеб гьечIо абурал гIадал. Гьел чагIазда цIехани, масала, как-кIал тIубалищин абун, тIубалеб батуларо. ТIубалезги мухIкан гьабулеб батуларо. ЗакагIат бахъун букIунаро. Суннатаб садакъа кьезе барахщун ратула. Радал-бакъанида гьарулел вирдал рукIунаро.
Балагьеха, цониги алатги хIалтIизабичIого гьезие цIуни киса щвелеб? Гьаб дунялалъул магIишат, боцIи гьедин рехун тани, гьебги батIалъула. ЦIуничIого тани боцIиги билула, гIарац-месед талавур гьабизе рес буго. БатIалъи щиб, ахираталъул гIамалазулги гьебго мисал буго.
Къуръаналда гIезегIан суратал, аятал руго инсан цIуниялъе цIалулел. Гьединго суннаталда дугIаби руго радал-бакъанида Бичасул Расулас цIалулел рукIаралги. Гьелги лъалел ратичIони, хIалтIизарулелги гьечIони, нилъ кин цIунилел?
Хасго гьаб заманалда гIемерлъун буго сихIру, жундуз кквей ва бергIеялъул унтаби. Амма гьелдаса цIуниялъе щибго гьабулеб гьечIо. Гьединав чиясе кигIан гIемераб дару-хер гьабуниги, жинцаго цIунулев гьечIебгIан заманалда жаниб, пайда дагьаб букIуна гьарурал тадбиразул.
Хирияв Аварагас ﷺ радал-бакъанида жив цIуниялъе цIалулел рукIарал дугIаби руго кигIанги. Гьелдаго тIадчIей гьабулаан асхIабзабазги табигIуназги. Амма нилъеца гьелъул милат гьаби тун буго. Гьелъул хIасилалда унтабиги цIикIкIун руго.
Киналниги захIмалъаби ва бигьалъаби руго БетIергьанас ﷻ кьолел ва тIаса росулел жал. Амма нилъеца хIаракат бахъизе ккола исламалъул нух щулаго кквезе. БетIергьанас ﷻ кьурал алатал хIалтIизаризе.
