Истигъфаралъул кIвар
Инсан вуго кидаго хатIа-лъулевлъун. КигIан цIуна-къан чIаниги мунагьалде гьев ккечIого рес гьечIо, щайгурелъул Аллагьас гьединавлъун вижун вугелъул. Мунагьаздаса цIунаравлъун рукIин аварагазабазул хасият буго. Гьединлъидалин инсан загIипав вижун вугин абулеб. БетIергьанас цониги унти бижун гьечIо дару цадахъ букIун гурони. Нилъедасан ккарал мунагьазеги буго дару – ккаралда ракI бухIун Аллагьасда мунагь чурейин гьари.
Гьедин гьараралъухъ БетIергьанас мунагьалда тIасаги лъугьун жеги цIикIкIарал даражабиги кьолел руго. Хирияб хIадисалда буго: «РакIалъеги буго дару кьаву-пахьалъе бугебго гIадин. Гьеб цIвакизабиги ккола тавбу гьаби». Абу Давудица бицараб хIадисалда буго: «Щив чи вугониги жинца астагъфируллагьал гIазима ллази лаилагьа иллагьувал хIаяял къаюма ва атубу илайгьи абун, гъазаваталдаса нахъе тIуригIанаб кIудияб батаниги гьесул мунагьал чурула», - ян. ТIокIабги нилъее щиб хIажат бугеб, диналъул вацал. Цересел умматазул щибаб мунагь чуризе ккани хасаб шартI букIунаан. МухIаммадил умматалъе цохIо ракI бухIун, унго-унгоги тIаса лъугьаян Аллагьасда гьарани гIолеблъун тун буго.
Цогидаб хIадисалда буго: «Истигъфар гьабиялда тIадчIей бугев чиясе Аллагьас кьола кинабниги ургъелалдаса бигьалъи ва кинабгIаги къварилъиялдаса гIатIилъи», - ян. Имам АхIмадица бицараб хIадисалда буго: «Иблисалъ абуна, Дур кIодолъиялхIаги чорхолъ рухI бугебгIан заманалда дица дур лагъзал къосинаричIого теларо. Цинги БетIергьанас абуна, Дирго тIадегIанлъиялдалъун гьедун абулеб буго, Дунги гьезул мунагьал чурулевлъун вукIина гьез истигъфар гьабулеб бугебгIан заманалда», - ян.
Байгьакъияс бицараб хIадисалда буго: «ТIадегIанав Аллагьас абула: ва Адамил лъимал, нуж киналго мунагьазде кколеллъун руго Дун тIаса лъугьаравни хутIун, Дидаса мунагьал рахчи тIалаб гьабе нужеца, Дица мунагьал чурила нужер! Дидаса мунагьал рахчи тIалаб гьабурав чи, Дир Къудрат букIинги лъан, Дица гьесул мунагьал чурула, сундулго кIварги гьабуларо», - ян.
Бищунго нилъее рохалилаб хабарлъун ккола жинда Аллагь разилъаяв ГIали-асхIабас бицараб: «Аллагьас жиндир лагъасул рекIелъе мунагьал рахчи тIалаб гьабизе ният рехуларо гьесие гIазаб гьабизе бокьунги букIаго, ай мунагь чуризе бокьун букIун гурони», - ян. Балагьараб заманалда инсанасда истигъфар гьабизе ракIалде рехулеб гьечIо гьесул мунагьал чуризе бокьун букIун гурони.
