Щукруялъул хIакъикъат
Щукруялъул хIакъикъат
БетIергьан Аллагьас абулеб буго муъминзабазда: «Нужеца щукру гьабуни, нужедаса мустахIикълъиго гьечIого Дица кьурал рехсарал нигIматазе ва гьелго нигIматазе щукру гьабуни гьел нигIматал рихьиялдалъун, нигIматал кьурав МунгIим, ай БетIергьан Аллагь вихьиялдалъунги, ай нигIматал кьурав чи Аллагь вукIин лъаялдалъунги, Жинде иманги лъуни, гьеб мехалда рукIуна нуж хIакъикъаталда Диде иман лъураллъун ва Дица гIазабалдаса цIунараллъун». Щукруялъул хIакъикъатго МунгIим вихьи ккола, ай Аллагь вати, Дов лъай.
Цогидаб аяталда буго: «Аллагь вуголъана, кьурал нигIматазе мукIурлъун, Жиндие щукру гьабурав лагъасе, гьелдаса разилъун, дагьаб букIаниги гIибадаталде данде цIикIкIун ажро-кири кьолевлъун ва щукру гьабулелги гьабуларелги Жинда лъалевлъун».
ГIали-асхIабасдасан бицана: «Нужехъе щвараб мехалда БетIергьан Аллагьасул нигIматазул цо рагIал, ай дагьабго къадар, нужеца тIуризабуге гьел нигIматазул хадуб бачIине бугеб, щукру гьаби дагьлъиялдалъун». Жиндие щварал, кьурал нигIматазда рекъараб щукру гьабичIесе рикIкIадасел, ай тIадегIанал нигIматал щоларо.
ТIадегIанав Аллагьас Муса аварагасда абун буго: «Дица жужахI бижичIо бахилав вукIун гуреб, киниги Дие бокьичIо Дир тушбабиги Дир вализабиги цо рокъор данде гьаризе», - ян. ТIадегIанав Аллагьас жинда тушманлъи рагIизабурав чиясдаса талихIкъарав чи щивха вукIинев?
ХIасил, нигIматазе щукру гьабиялдалъунги, БетIергьан Аллагь цо гьавун, Гьесда иман лъеялдалъунги гурони инсан хвасарлъуларо жужахIалъул цIаялдаса. Гурони, гьев чи вукIуна жиндирго напс жинцаго гIазабалде бачаравлъун. КантIе, гIадамал!
(СагIид-афандиясул рухIияб ирсалдаса
