ГIабдулхаликъил Гъуждуванияс жиндир магIнавияв вас Авлиякабирие гьабураб васият
Я дир вас, дир дуе васият буго дуца гIелму, адаб, такъва лъазабе киналго хIалазулъ. Кидаго тIаса бище вахчун вукIин. Кинал ругониги хIужабазда яги документазда гъоркь дурго цIарги хъвачIого букIине хIаракат бахъе.
ХIукму къотIулеб махIкаматалда гъорлъги гIахьаллъуге. Цонигияв вачIинавизе гIоло гъоркьги чIоге. ГIадамазул васиятазда гьоркьовеги лъугьунге. Ханзабазулгун гьезул лъималазулгун гьалмагълъиги гьабуге. РибатIалги раге, гьенив жанив гIодов чIунги вукIунге. ШигIрабазухъ гIенекки гIемер гьабуге. Гьеб гIемерлъиялъ нифакъ лъугьинабула ва ракI хвезабула. ШигIрабахъ гIенеккиялде инкарги гьабуге, гьелде гIенеккулел гIемер ругелъул.
Калам, тIагIам ва макьу дагьавлъун вукIа. Халкъгун жуваялдаса тIура, гъалбацIалдаса кинниги ва халваталда вукIиналда тIадчIей гьабе. ГIисинал лъималгун, руччабигун, бидгIачагIигун, бечедалгун, чIухIаралгун ва гIадатияб халкъгун гьалмагълъи гьабун кидаго цадахъ вукIиналдаса цIуне мунго.
ХIалалаб кванай, шубгьаялдаса цIуне. Хъизанги гьабуге, гьеб гьабуни, дунял тIалаб гьабизе ккун, дин ина гьороца босун унеб хIургIадин. Велъанхъиги гIемер гьабуге, кIаркIадун велъиялдасаги цIуне. ГIемер велъиялъ ракI хвезабула.
Щивав чиясде мун балагье гурхIалидалъун. Цониги чи хIакъир гьавуге. Дурго загьир берцин гьабиялда тIад хIалтIуге, гьеб берцин гьабиялъ бицуна батIин хвей. Цониги чиясулгун дагIбаги гьабуге. Щибго жо цониги чиясдаса тIалабги гьабуге. Дуего хъулухъ гьабейин цогидасдеги буюруге.
Машаихзабазе хъулухъги гьабе боцIудалъун, черхалдалъун ва рухIалдалъун. Гьезул цониги ишалде инкарги ккоге. Машаихзабазде инкар ккурасе киданиги талихI кьоларо. Дунялалдалъунги, гьелъул агьлуялдалъунги гуккаравлъунги вукIунге мун.
Кидаго рекIеда ургъел чIваравлъун вукIине рекъараб буго. Черх унтаравлъун, бадиса магIу бачIуневлъун, гIамал бацIцIадавлъун ва дугIа хIелун гьабулевлъун вукIа.
РетIел басриявлъун вукIа. Гьудул, ритIухъав тIалиблъун вукIа дур. Аслияб мал факъру букIа, рукълъун мажгит букIа ва дур ракI гъезабулевлъун Аллагь вукIа.
