Кьураб босулаго цIунила…
ХIурматиял бусурбаби, нилъее кинаб бугониги пайда-хайир бачIиналъул шукруялдаса ккола Аллагьасего гIадин гьелъие сабаблъун ккарасеги баркала кьей. Жибго гьесие гьабулеб хIурмат букIине рекъоларо гьев васитIа вукIин кIоченабулебгIанаб. Нилъехъе жиндаса пайда бачIарав чиясе гьабизе кколеб шукру буго гьев сабаблъун ккарабгIанасеб къадаралда. Киналниги нигIматазе аслулъун вугев Аллагьасе реццги гьабун хадуб букIине рекъола гьелъие сабаблъун ккарасе гьабулеб хIурматги.
Амма цо-цоязда гьеб кинабго кIочон, гьев чияс цохIо жиндие ризкъи биччалеб бугеб гIадин кколеб рецц-бакъ гьабула. Гьелда гьоркьоб батIалъи гьабизе ккола чара гьечIого. Гьеб нигIматалъе сабаблъун ккарасе гьабураб рецц-бакъалъ БетIергьанасул хIурматги холаро, гIорхъаби цIунулел ругони. Бичасул аварагас ﷺ абун буго: «ГIадамазе шукру гьабуларес Аллагьасеги гьабуларо», - ян. Къуръаналда жаниб БетIергьанас Жинцагоги рецц гьабуна лагъзадерие.
Хирияб хIадисалда буго: «Нужее лъикIлъи гьабурав чиясе данде лъикIлъи гьабе. Гьедин гьабизе бажаричIони гьесие дугIа гьабе нужедаго гьеб лъикIлъиялда бащалъанин ккезегIан», - ян.
Жиндие садакъа кьолес гьадинаб дугIа гьабизе рекъола: «ТIагьара ллагьу къалбака фи къулубил абрар ва закка гIамалака фи гIамалил ахяр ва сваллаллагьу гIала рухIика фи арвахIи щугьадаъ». (МагIна): «Дур ракI бацIцIад гьабеги лъикIал гIадамазул ракIал кинниги. Дур гIамалги бацIцIад гьабеги лъикIал гIадамазул гIадин. Дур рухIалда цIобги лъеги шугьадаазул гIадин».
Нилъее гьабураб жоялъухъ данде гьабулеб шукруялдасан ккола, гьелда гIайиб чIвангутIи, кигIанго гьелда мукъсанлъи батаниги. Гьединго гьеб кьураб жо хIакъираблъун бихьиларо, какиларо. Нагагь кьолеб букIараб гIадаталда рекъон кьечIого хутIани, бадибчIвай гьабиларо.
Жиндие кьураб жо кIудияблъун бихьила, гIадамазда цебеги гьеб кIудияблъун бихьизабула. Щайгурелъул жинца кьолесул хIакъ буго гьитIинаблъун бихьи, амма босулесул хIакълъун ккола гьеб кIудияблъун бихьи.
Гьеб киналдаго цадахъ кIочене бегьуларо кинабго жо кьолев яги гьукъулев БетIергьан Аллагь вукIин.
Амма халкъалда гьоркьор гьал адабаллъун рехсарал ишал тIуразарулеллъун гIемерал рихьуларо. Адабал цIуничIони камилаб кириги щоларо.
Аллагьас кумек гьабеги киназего шаргIалъул гIорхъаби цIунун хьвадизе! Амин!
