Сахлъизе ккани, дару къваригIуна
ГIалимзабаз абула рияъ кIудияб мунагь ва рекIел унти кколин. Гьеб лъазе захIмалъула къаси бецIаб сардилъ унеб чIегIераб цIунцIраялдасаги. Сах гьабизе жеги захIмалъула. ГIумар ибн ХатIабица абуна: «Жиндир рекIелъ гьечIеб жо гIадамазе загьир гьабулев чияс нифакъалда тIаде нифакъ загьир гьабуна», - ян. Щайгурелъул, гIадамазда цеве лъикIавлъун вихьизе гьечIеб жо хIалев вукIиналъ. Гьединго гьесго абуна: «ГIадамазда цебе гьечIеб жо хIалев чи Аллагьас ﷻ гIодовегIан гьавуна», - ян.
ГIали-асхIабас абуна рихьдае жо гьабулев чиясул лъабго гIаламат бугин: «Живго вугев мехалъ кIвахIаллъула, гIадамазда гьоркьове ккедал тирха-кIичула, веццидал - гIемерал гIамалал гьарула, какидал - дагьал гьарула», - ян.
ГIабдулкъадир Жиланияс абуна: «Рияъ лъаларо рацIцIалъарал гIадамазда гурони. Рияъ, гIужбу ва нифакъ шайтIаналъул чIорбутI ккола, жинцаги гIадамазул рекIелъе рехулеб», - ян.
ГIабдуллагь ибну Мубаракица абуна: «Зугьдалъул бищун лъикIаб ккола зугьд бахчи», - ян.
Ибрагьим ибну Адгьамица абуна: «Аллагьас ﷻ ритIухъ гьавичIо машгьурлъи бокьарав чи».
ХIарису МухIасабияс абуна: «Рияъ ккола гудразул бищун балъгояб».
ЖагIфар ибну МухIаммадица абуна: «Рияъалдаги ихласалдаги гьоркьоб бугеб батIалъи ккола, масала, рияъчияс гIадамазда бихьизе гIамал гьабула, амма ихлас бугев чияс Аллагьасдасан гIамалалъул кири щвезелъун гьабула», - ян.
Гьединго нилъеда лъазе ккола нияталда гIемераб жо бараб букIин. Нилъ ният бацIцIад гьабиялда ва гьеб къачIаялда тIад хIалтIизе ккола. РекIел унтабаздаса цIакъ къанагIатав чиясда гурони вацIцIалъизеги кIоларо. Гьединал гIадамалги цIакъ дагьал гурони рукIунаро. Гьелъин гIалимзабаз абулеб, хIакъикъияв шайих кквезе тIалъулин. Гьесул тарбиялда гъоркь хIаракат бахъула рекIел унтабаздаса вацIцIалъизе. Бачина цо мисал. Бокьараб даруги босун нилъеда лъаларо дару гьабизе. Гьабуни, гьалаг гьаризе рес буго. Гьелъин нилъее къваригIунев махщел бугев тохтур. Гьезда гьоркьовги вукIуна ххвел гьабулев тохтур. Гьединго рукIуна шайихлъи хIалелги. Гьединлъидал Къуръан-хIадисалдаса нафс бацIцIад гьабулеб дару хIалтIизабизе нилъеда лъаларо. Щайин абуни, нилъер жагьиллъиялъ. Гьеб лъала нафс квегъун, гьеб бацIцIад гьабурав хIакъикъияв устарасда. Гьединав устарас, унтиялда рекъон, рекъараб дару балагьула.
Унтарав чияс, сахлъизе ккани, хIаракат бахъизе ккеларищ? Тохтурас дару хъванин абун гьев чи сахлъуларелъул, гьес малъараб гьабичIони. Гьединго шайихас малъараб жо гьабуни, гьесул ракIги бацIцIалъула.
