Сабру тIагIин буго балагь
Сабру тIагIин буго балагь
Кинаб бугониги балагь бачIиндал, нилъеда ракIалде ккола гьабунщинаб гIадада хванин, дица щиб гьабилебин абун, сабру тIагIуна. Гьеб буго мекъаб пикру, гьединаб лъугьа-бахъиналда сабру гьабун чIезе ккола. Сабру гьабиялъулъ буго инсанасул къуват, бусурбанчиясул иман. Балагь бачIиндал, гьелъ ракI бакъвазабун гIодунин абун щибго къварилъи гьечIо, ракIалдалъун нилъ Аллагь ﷻ разияб нухда ругебгIан мехалъ.
Гьединаб лъугьа-бахъин ккедал Аллагьасулгун ﷻ хурхен щулаго ккун, Гьесул хIукмуялда разилъун, аварагас ﷺ малъаралда нахъ рилъун чIела. Гьединаб заманалда, лъикIаб насихIатлъун ва сабру гьабизе бигьалъиялъе сабаблъун букIине, аварагасул ﷺ чанго хIадис рехсезин.
Муслимица бицараб хIадисалда Аварагас ﷺ бицун буго: «Муъминчиясул бугеб гIажаибаб хIал. Кинаб ахIвал-хIалалда гьев вугониги цогиясе кьечIеб хасаб нигIмат буго гьесие гьеб. Кинаб бугониги ишалъ вохизавуни, Аллагьасе ﷻ шукру гьабула, гьебги нигIматлъун лъугьуна. Балагь бачIани, гьелде сабру гьабула ва гьебги нигIматлъун буго. Аллагьасе ﷻ гIадамал рокьулеб мехалъ, гьезул хIалбихьизе тIаде балагьал риччала. Гьез Аллагьасул ﷻ хIукмуялда разилъи загьир гьабуни, гьезиеги Аллагьасул ﷻ разилъи щола. Ццин бахъин, сабру гьечIолъи бихьизабуразда, Аллагь ﷻ рази гьечIолъи ва ццин бахъинги бихьула».
Умму-Саламаца бицун буго: «Дида рагIун букIана аварагас ﷺ абулеб: «Кинав вугониги лагъасде Аллагьас ﷻ балагь биччайдал лагъас абуни: «Инна лиллагьи ва инни илайгьи рраджигIун» (нилъер рукIа-рахъин Аллагьасе ﷻ буго, ахир руссенги Гьесде буго), я Аллагь ﷻ, гьаб тIаде бачIаб Дуца ﷻ дие мунагьал чуризелъун гьабе, гъоркь букIаралдаса лъикIаб тIадеги кье», - ян. Аллагьас ﷻ гьесие лъикIаб жазаъ гьабила ва цебе букIаралдаса лъикIаб тIадеги кьела», - ян.
Аварагас ﷺ абулаанин абун Абу-Гьурайратидасан Тирмизияс бицана: «Бусурбабазде, гьезул боцIи-малалде, наслуялде тIаде рачIунел хIалбихьиял къотIуларо, гьез Аллагьасда ﷻ мунагьаздаса рацIцIадаллъун дандчIвай гьабизегIан».
«Лагъасе лъикIлъи бокьидал Аллагьас ﷻ гьесие гьанибго гIакъуба гьабула, квешлъи бокьидал - Къиямасеб къоялде нахъбахъунги тола».
ХIакъикъаталдаги, Аллагьас ﷻ нилъее хъваралда разилъун чIей черхалъе лазат, рекIее парахалъи ва Гьесул хIукму-шаргIалда божилъигун ракIчIей буго.
