Бегьулищ яги бегьуларищ?
Бегьулищ яги бегьуларищ?
Агьлу-сунна валь-жамагIаялъул гIалимзаби (ункъабго мазгьабалъул имамзабиги) тIадрекъараб жоялдасан буго, аварагзабаздаса, гьезул халипзабаздаса, вализабаздаса, чIагояздасаги хвараздасаги, тавасул гьабизе бегьиялда. Гьединго, гьезул хабалазде ине, гьенибги гьездаса тавасул, шафагIат гьаризе ва жидер хIажатазе кумекги тIалаб гьабизе бегьиялда.
Имам Фахрудин ар-Разияс абун буго: «Ал-Малик Ас-СалихI Гъаврияс дида цIехана хабалаздеги хвараздеги щун зиярат гьабун пайда босиялъул къагIида кинаб бугеб?» - абун.
Фахрудиница абураб хъвазегIан, цеберагIилъун, ХIасан-афандияс «Ас-Сифрул асна фи рабитIатил хIусна» абураб тIехьалда хъвалеб рехселин: «Нилъеца далилал рачана инсанасул рухI черхалдаса батIалъун хадуб нахъе хутIулеб букIиналъе. Жеги гьеб, ахираталде рещтIун, черхалдаса батIалъун, пардав тIаса индал, батIи-батIиял балъгоял жалги жиндие загьирлъун, черхалда хурхарал напсаздаса къуватабги бугеблъи… Цинги гьединаб напсалъе хIасуллъула камилал жалазул цо-цо бутIаби…».
Гьаб цеберагIи дуда лъайдал, рехсолеб буго Фахрудин ар-Разияс баян гьабуралъул къокъаб хIасил: «Инсан, жиндир напс, ай рухI (чIаго вукIараб заманалъ) камилаб жавгьарлъун, асар гьаби кутакаблъун букIарав, къуватав чиясул хабаде индал ва гьениб дагьаб заманалъ чIедал, гьесул напсалде доб хабадаса асар щола. Зиярат гьабурасул напсалъеги ва (гьенив вукъун вугев) хварав инсанасул напсалъеги, гьеб ракьалда жал данделъи сабаблъун хIасуллъула цоцазулгун (рухIияб) дандчIвай. Цинги гьезул напсалги лъугьуна, цоялъул чIорал цогиялда жанир гIакслъун рихьуледухъ рахъун чIезарурал кинниги ругел кIиго матIуялда релълъун. Гьелъул хIасилалда гьесул нур досде, досулаб гьесде буссуна.
Гьаб нухалдалъун лъугьуна доб гьабураб зияратги жинца гьабурасеги жинде гьабурасе мунпагIат ва кIудияб рохел хIасуллъиялъе сабаблъун. Гьаб буго аслияб сабабги зиярат гьабиялъе. Гьединго, рехсаралдасаги гъваридал ва (хIасуллъизе) цIикIкIун мустахIикъал цоги-цогидал балъголъабиги гьенир хIасуллъи рикIкIадаб (лъугьунареб) жолъун гьечIо. Унго-унголъун гIелму цIубайги Аллагьасда ﷻ аскIоб гурони гьечIо. (Гьес рагьула жиндие бокьарасе)», - абун.
Зиярат гьабулес цIунизе рекъараб адаб буго, чIаго вукIун цеве чIедал гьабулеб кинниги.
Машгьураб рагIи буго: «Нужер лъикIал руго, жал рихьидал Аллагь ﷻ ракIалде щолел», - абун.
Аллагьас ﷻ нилъ щула гьареги Гьев ﷻ ракIалде щвезарулезда аскIор.
