ДугIаялъул хIакъикъат
Нилъер дугIа ккола махлукъаталдаги Халикъасдаги гьоркьоб бугеб балъгояб кьолъун. ГIемерисеб мехалда кIвар кьола нилъеца гьарулеб жоялде, амма аслияб жо кIочон тола – лъидехун нилъеца хитIаб гьабулеб бугебали.
ДугIаялъул хIакъикъияб гъварилъи загьирлъуро нилъее къваригIараб жо щвеялда жаниб, гьеб щола жив ТIадегIанав Аллагьасде ﷻ хIажалъун вукIин бич1ч1иялдалъун ва РахIманасда божилъи гьабулеб мехалъ. Гьединаб, ракIбац1ц1адаб хIажалъиялъ лъалъараб дугIа лъугьуна рухIияб мунажатлъун (Аллагьгун ﷻ кIалъай).
Гьелъие жаваб щолеб гьеч1ин кканиги, ракIч1ун лъай: дур дугIа цебего рагIун букIин. ХIасил, жибго дугIа ккола гIибадат. Цо валияс абуна: «Аллагьас I дун дугIа гьабиялдаса махIрум гьави дие ц1икIкIун захIмалъула, жаваб щвеялдаса», - ян. Гьес гьедин абуна, щайгурелъул жибго дугIа гIибадат букIин, гьелдалъун нилъеца бихьизабула Аллагьасде ﷻ нилъер хIажалъи. Нилъеца щукру гьабизе ккола ТIадегIанав Аллагьас ﷻ нилъее Жиндихъе руссине ва гьаризе рес кьолеб букIиналъухъ. Аллагьасе ﷻ бокьула дугIа гьабулеб мехалъ. Къуръаналда ТIадегIанав Аллагьас ﷻ абуна: «Нужеца Дида гьаре, Дица нужее жаваб кьезе буго», - ян. Амма гIемерисеб мехалда нилъеца кIвар кьола гIиц1го нилъеего бокьараб жоялде ва гьелда тIадеги нилъее бокьула хехго жаваб щвезе.
Хирияб хIадисалда буго: «ДугIа ккола гIибадаталъул нах», - ян. Нилъеца дугIа цин гьабун, цин гьабич1ого теч1ого, гIемер гьабизе ккола. Байгьакъияс АвзагIиясдасан бицана: «Бищун лъикIаб дугIа ккола Аллагьасда гIемер тIадч1ун гьари ва Гьесда цеве хIелун ч1ей».
ДугIа къабуллъизе ккани, кваназе ккола бац1ц1адаб, хIалалаб квен. Цо гIалимчияс абуна: «Аллагьасде ﷻ дугIа гьабулев чияс хIалалаб квен кванай, хIарамаб жо кванаялъ дугIа нахъч1вала», - ян.
