Кутакалда беццараб пиша
Кутакалда беццараб пиша
РитIухълъи цIуни буго кутакалда беццараб пиша. ТIадегIанав Аллагьас ﷻ абуна Жиндие бокьулин ритIухълъи ва ритIухъал чагIийилан. РитIухълъиялъ инсан гIагар гьавула алжаналде.
Аварагасул ﷺ хIадис буго: «Нужеца ритIухълъи гьабе, ритIухълъиялъ нуж рачуна такъваялде, такъваялъ рачуна алжаналде», - ян.
Киназдаго рагIун батила ГIали-асхIабасул къолденалъул хIакъалъулъ ккараб къиса. Ягьудияс гьеб къолден нахъе кьола исламалда бугеб ритIухълъи бихьун. Гьес исламги къабул гьабула. Гьединаб асар гьабулеб жо ккола ритIухълъи.
ГIумар-асхIабас абун буго ритIухълъи цIунизе хIаракат бахъейин чIвалев вугониги.
Ибну ГIабасица абун буго жиндилъ ункъо пиша бугев чиясулъ хайир бугин. Гьел пишабиги ккола: ритIухълъи, нич, щукру ва гIамал берцинлъи.
Фузайл ибну ГIиязица абуна Аллагьасе ﷻ бищун бокьулеб жо кколин ритIухъаб мацI ва бищун бокьулареб кколин гьереси бицунеб мацI.
РитIухълъиялда тIасан гIалимзабазул цояс абун буго гьеб кколин бацIцIадаб гIакъида, жиндилъ къосен гьечIеб. Цогидаз абун буго ритIухълъи кколин Аллагьасе ﷻ бугеб къотIи гIамалалдалъун тIубай.
Абу ЯгIкъуб Нагьрияс абун буго ритIухълъи кколин жанисаги къватIисаги рекъонккей.
Пуланав гIалимчияс абун буго бахIарчилъиялдаса тIадегIанаб жо ритIухълъи гурони гьечIилан.
Язид ибну Майсаратица абун буго гьереси бициналъ тIолалго квешлъабазул нуцIа рагьулин.
Абу Юсуф ибну АсбатIица абун буго ритIухъав чиясе ризкъилъун лъабго жо щолин: гьуинлъи, гьайбатлъи ва берцинлъи.
Пуланав чияс хIакимасда абула жинда ритIухъав чиго вихьичIилан. Мунго ритIухъавлъун вукIаравани, дуда гьел рихьилаанин абун жаваб кьун буго дандиясги.
РитIухълъи кколила жанисанги къватIисанги цого хIалалда вукIин.
ТIадегIанав Аллагьас ﷻ Давуд аварагасухъе вахIю рещтIун абула: «Я Давуд! Жанисан Дун ритIухъ гьавурав чи Дица халкъалда цевеги ритIухъ гьавула.
Гьереси бициналъул гIаламат ккола гьедари, гьеди тIалаб гьабулев чи гьечIониги», - ян.
