КIвар бугел тIадкъаял
КIвар бугел тIадкъаял
Къосарав ибн Мулжамица ГIали-асхIабасда хвалил ругъун лъуна. ГIумруялъул ахирисел сагIтазда гьесда аскIове вачIана гьесул вас ХIасан. ГIолохъанчи гIодана.
ГIали-асхIабас гьесда гьикъана:
- Я вас, щай мун гьедигIан ракI буссун вугев?
ХIасаница жаваб кьуна:
- Гьаб дунялалда дур ахирисел лахIзаталги ун, батIияб дунялалде лъугьунаго кин дун пашманлъиларев?
Инсуца жаваб гьабуна:
- Я вас, ракIалде щвезабе ункъо ва жеги ункъо къотIи. Гьезда нахъвилълъани, дуе щибго зарал ккезе гьечIо.
Бищун лъикIаб бечелъи буго гIакълу. Бищун кIудияб мискинлъи – ахIмакълъи. Бищун кIудияб янгъизлъи ккола чIухIи, тIокIлъи. Щайгурелъул чIухIиялъ сверухъ ругел гIадамазул тушманлъи ва ццин бахъинаби бижулеб буго. Гьелъул хIасилалда, гьединав чIухIарав чиясдаса гIадамал рикIкIалъула. Бищунго лъикIаб тIадегIанлъи ва къадру – лъикIаб гIамал-хасият буго.
ХIасаница гьикъана:
- Я дир эмен, гьаб ункъабго васият буго, хутIараб ункъабгоялъул хIакъалъулги бице, - ян.
- ГIабдаласулгун гьудуллъиялдаса цIуне. ХIакълъунго, дуе пайда гьабизе бокьун букIаниги гьес дуе зарал гьабила.
Гьереси бицунев чиясулгун гьудуллъиялдасаги цIуне. Гьес рикIкIад бугеб жо дуда гIагарда бугеблъун бихьизабила, гIагарда бугеб рикIкIадаб бихьизабила. ХIалихьатав чиясулгун гьудуллъи гьабиялдасаги рикIкIалъе. ХIакъикъаталдаги, гьес мун рехун тела бищунго хIажатаб лахIзаталда.
Воре, квешав чиясулгун гьудуллъи гьабиялдасаги цIуне, гьес мун чIобого вичизе вуго.
