Аллагьгун ﷻ кIалъай
Аллагьгун ﷻ кIалъай
Как буго диналъул хIуби, рекIел нур, инсан тIадегIан гьавулеб гIамал. Хирияб Къуръаналда ТIадегIанав Аллагьас ﷻ абулеб буго (магIна): «Какалъ цIунула кинабниги нахъегIанабги вахIшиябги жоялдаса», - абун (суратул «ГIанкабут» 45 аят).
Загьирияб рахъалдасан рацIцIалъи гуребги, какалъ жеги гIемераб жанисеб рахъалъулъги бакI ккола.
ГIамал-гIибадаталъулъ гъваридал магIнаби ричIчIарал вализабазгун шайихзабаз гIемерал рухIиял хасслъаби загьир гьаруна как бай, рукугI-сужда гьаби, зикру-тасбихI бачиналдаса бугеб.
ГIабдулкъадир Жиланияс абуна: «Как базе вахъунеб мехалъ, пикру гьабе мун Аллагьасда ﷻ цеве чӀун вугеблъи, дунялалъул каваби дуе къан рукIин. Аллагь ﷻ дуда вихьаравани, дур пикру цогияб жоялде буссине букIинчIо», - абун.
Ибну ГIатIаиллагь Искандарияс хъван буго: «Какилъ жив лъида цеве вахъун чIун вугевали бичIчIулев хехдаризе гьечIо жиндирго ворха-къулиязулъ. Щайин абуни, какилъ гIедегIи буго рекIелъ хIузур гьечIолъиялъул гIаламат», - абун.
Жунайдул Багъдадияс абуна: «Как буго рукъалъул кӀалтӀасан чвахулеб гӀоралда релълъараб жо. Чи, къойида жаниб щуго нухалъ гьенив ччун-вахъунев вугони, кинаб чороклъи гьесда хутӀилеб?» - ин.
Шайих Багьавудин Накъшубандияс насихIат гьабуна: «Как бай гьеб ахирисеб бугеб гӀадин. Гьеб мехалъ бичIчIила дуда ракӀбацӀцӀалъи ва ихлас», - абун.
Ибн ГIарабияс абуна: «Как буго муъминчиясул мигIраж. Какилъ гьеб дуда халлъулеб гьечIони, мун гьелъул гъварилъуде лъугьинчIевлъун вуго». МигIраж бугелъул Авараг ﷺ зодовеги вахун, Аллагьгун ﷻ дандги чIван, как умматалда парз гьабураб бакI.
Как ккола рухIалъе дару. Имам Гъазалияс хъван буго: «Кинаб баракат, рекIее парахалъи как балеб мехалъ рещтӀунебали гӀадамазда лъалеб букӀарабани, гьез гьеб киданиги телароан, бусада регун ккун ругониги», - ян.
Шайих АхIмад РифагIияс абуна: «Как базе рахъине шайтIаналъ кIвахI рехулеб мех букIин лъай, как баялдалъун дуде бачIунеб нур щвеялдаса хIинкъун шайтIаналъ гьабулеб», - ин.
Как гуро цохIо къула-рорхун щуго минуталда жаниб гьабулеб гIамал. Гьеб буго Аллагьасулгун ﷻ унго-унголъунги гьабулеб калам.
Абул ХIасан Шазалияс абуна: «Как бай Аллагь ﷻ вихьулев вугев кинниги, дуда Гьев вихьичIониги Гьесда мун вихьулелъул», - ян.
БетIергьанас ﷻ кьеги щивасе тIадехун рехсараб кинниги какилъ хIузур цIунулеб рекIел бацIцIалъи! Амин!
