Салул гама
ТIадегIанав Аллагьас ﷻ нилъеда сверухъ бижана гIемераб хIикматаб ва гIажаибаб жо нилъ кIантIизе рукIине. Гьединаздасан ккола варанаби, зобал, мугIрул. БетIергьанас Маккаялъул мушрикиназде хитIаб гьабун абула: «Гьал Маккаялъул мушрикинал кин ралагьуларел варанабазухъ ва жидеца пикру щай гьабулареб Аллагьас ﷻ киндай гьел рижун ругелин абун».
ГIарабиязе бищунго бокьулеб ва гьезул аслияб магIишат варанаби рукIиналъ, ТIадегIанав Аллагьас ﷻ гьезда абуна: «Нужер рокъор ругел ва мунпагIат босулел варанабазул пикру кин гьабулареб нужеца? Нужеда Аллагьасул ﷻ къудрат ва хIалкIолъи бичIчIизе букIине. ХIакълъунго, варанаби гIажаибаб махлукъат буго. Гьезда жаниб кутакаб къуват буго ва кIудияб манзилги нахъа тезе кIола. ТIадежоялъе, бакIаб жоги баччула гьез ва загIипав чиясеги мутIигIлъула. Гьелъул расалдаса ва рахьалдаса пайда босула». ШурайхI Къазияс абулаан къватIире рахъаян варабаназухъ балагьизе, кин гьел рижун ругелали бихьизе. Гьелъие гIоло гьелда абула салул гамийилан. Гьелда гIемераб заманалъ багIарараб бакIалда къеч кквезе кIола.
Варанаби рикIкIуна жидедаса закагIат бахъизе кколел хIайваналлъун. Гьединго гьезул гьан кваназе хIалалаб буго.
«Гьал зобал киндай Аллагьас тIаде рорхун ругелали щай балагьуларел? Гьал мугIрул кин рахъун чIезарун ругел? Гьаб ракь кин тIибитIун бугеб?» Щай гIадамаз хал гьабулареб ва гьелдаса вагIза-насихIат босулареб? Гьел мугIрул Аллагьас магI гIадин гьаруна, ракь багъарун, нилъее квалквал гьабичIого букIине. Жеги гьезда жанир гьаруна батIи-батIиял магIданал, нилъеца пайда босулел.
«Мун гьезде тIаде тIамурав гьечIо, гьезда хIал гьабун исламияб дин босизабизе». Дуда цохIо гьезде щвезабизе гурони тIадаб жо гьечIо, Нижеца (Аллагьас) гьезда тIад хIисаб гьабизе буго.
«Амма жидеца Аллагьасда инкар ккурал ва дур вагIза-насихIаталдаса руссарал гIадамазе Аллагьас цIакъ кIудияб гIазаб гьабизе буго». «ХIакълъунго гьел киналго Ахираталда, Диде руссине руго. Дица гьабизе буго гьезул хIисабги».
Киназего рекъараб жазаъ гьабизе буго. ЛъикIал гIамалазухъ лъикIаб, квешал гIамалазухъ квешаб.
Гьаниб нилъее дарс буго, ахир-къадги нилъ рижарав Аллагьасухъе ине руго. Нилъехъе кьезе руго гIамалал хъварал тIахьал яги кваранаб рахъалдасан яги квегIаб рахъалдасан. Кваранаб рахъалдасан кьуни - рохел букIина, квегIаб рахъалдасан кьуни - пашманлъи букIина.
