Инсан тIадегIан гьавулеб гIамал
ЧIухIи гьечIолъи ккола инсан берцин гьавулеб ва гIадамазул ракIал рагьулеб тIабигIат. ЧIухIи гьечIев чияс жиндирго рагIабазул ва гьарулел ишазул хIисаб-суал гьабула. ЧIухIи гьечIолъи ккола инсанасул тIабигIат битIараб букIиналъул гIаламат ва гьелъул хIасилги ккола гIадамаздехун ва ТIадегIанав Аллагьасдехун ﷻ гIамал берцин гьаби.
Аварагас ﷺ абуна: «ТIадегIанав Аллагьас ﷻ диде вахIю гьабуна цояс цогидазда тIад чIухIи бихьизабугеян ва цоцазе зулму гьабичIого нуж гIодоре риччан рукIаян», - абун (Муслим, Абу Давуд, Ибн Мажагь).
Хирияв аварагасул ﷺ гIумруялъул халгьабидал нилъеда халлъула гIадатияв инсан гьев вукIаравлъи. Я кванилъ, я ратIлилъ, я мина-рукъалъулъ гIадатиял гIадамаздаса ватIа вахъулароан. Кваналеб мехалдаги гIодове виччан ва гIодов чIун кваналаан. Аварагас ﷺ абулаан: «Дун вуго Аллагьасул ﷻ лагъ, лагъ гIадин гIодов чIола ва лагъ гIадин кванала», - ян.
«Хан-авараглъунищ ялъуни лагъ-авараглъунищ дуе вукIине бокьилеб?» - илан цIехедал, аварагас ﷺ абуна, лагъ-авараглъун вукIине бокьилин абун.
Мажгитал ралелъубги, Мадина шагьаралда сверухъ хандакъал рухъулелъубги, кигIан захIмалъиялда ругониги, хирияв аварагги ﷺ цадахъ хIалтIулев вукIунаан. Кумек гьабизе нахъа чи гьечIезул, къоролзабазул гьариялъе кидаго жаваб гьабулаан. Киве гьез ахIаниги ахIаралъуве унаан ва къваригIелги тIубалаан. Аварагас ﷺ хьитал рукъулаан, рокъоб гьабулеб хIалтIуе хъизаналъе кумек гьабулаан, хIамида рекIинеги чIухIулароан.
Мискин-пакъирал унтидал гьезухъе зияраталъги ун, гьезул унтараб бакIалда кверги лъун, Аллагьасда гьарулаан сахлъи кьеян. Мискин-пакъирасцин шагьаралъул цояб рагIалде гьоболлъухъ ахIидал, авараг ﷺ гьениве унаан. Гьесул ﷺ берцинаб гьумер бихьун пуланав чи сородун лъугьиндал, аварагас ﷺ абуна: «ГIодове виччай, дун я хан, я зулмучи гуро. Дун вуго бакъвараб гьан кваналей гIадатияй къурайшиялъул вас», - илан.
ГIадамазде аскIове вачIиндал гьел тIаде рахъинеги аварагасе ﷺ бокьулароан. Гьес ﷺ абулаан: «ЧIухIарав чи Аллагьас ﷻ гIодовегIан ва чIухIи гьечIев тIадегIан гьавула», - ян.
ТIаде гIадамал рачIиндал, цогидазда тIадкъачIого, аварагас ﷺ жинцаго гьабулаан гьезие хъулухъ.
