Баракат
Нилъеда гIемер рагIула «баракат лъегиян» гIадамаз цоцазда абулеб. Гьеб ккола гIараб мацIалъул рагIи ва гьелъул цо ккураб магIнаги гьечIо. Аллагьасул ﷻ рахъалдасан баракат лъей ккола рахIматал рещтIин.
Нилъеда гIемер рагIула «баракат лъегиян» гIадамаз цоцазда абулеб. Гьеб ккола гIараб мацIалъул рагIи ва гьелъул цо ккураб магIнаги гьеч1о. Аллагьасул ﷻ рахъалдасан баракат лъей ккола рахIматал рещтIин. БоцIуда баракат лъей ккола гьеб цIик1к1ин, рукъалъулъ – гIодобе биччай, кванилъ – гIорцIизари, хъизамалъулъ – гIамал берцинлъи, сахлъиялъулъ – унтунгутIи ва дару сабаблъи, заманалъулъ – эркенаб заман бук1ун къваригIел тIубазе мех гIей, гIумрудулъ – иманалда гIемер сонал кьей, наслу лъик1аблъун лъугьин. Къокъго абуни, баракат ккола кинабниги лъик1абщинаб.
Жинда Аллагь разилъаяв Рагъиб Асфагьанияс баракаталъул бицун абуна: «Баракат ккола ТIадегIанав Аллагьас цо жоялъулъ даимго нигIмат лъей», - абун.
Хирияв Аварагасги ﷺ гIемерал дугIабазулъ баракат тIалаб гьабизе малъана. Масала, нилъ кваназаруразе дугIа малъана: «Аллагьумма барик лагьум фима разакътагьум вагъфирлагьум вархIамгьум», - абун. Гьелъул магIна ккола: «Я Аллагь ﷻ, Дуца ﷻ гьезие кьураб ризкъиялда баракат лъе, гьезул мунагьалги чуре ва гьезда Мун ﷻ гурхIа», - ян.
Баракат тIалаб гьабизелъун гьаб дугIаги малъана: «Аллагьумма барик лана фигьи», - абун. МагIна: «Я Аллагь ﷻ, гьаб жоялъул дуца нижеда баракат лъе», - ян.
ХIаким ибн ХIизамидасан бицана: «Цо къоялъ дица Аварагасухъа ﷺ цо жо гьарана ва гьес ﷺ дие гьеб кьуна. ЦIидасан гьаридалги кьуна Аварагас ﷺ. ТIадвуссун жеги лъабабилеб нухалда гьаридалги Аварагас ﷺ нахъч1вач1о ва амма гьал рагIаби абуна: «Ле, ХIаким, боцIи гьуинаб пихъалда релълъуна. Сахаватавлъунги вук1ун гьеб босарасда баракат лъола, амма напсалъе бокьарабги гьабун босарасул баракатаблъун гьеб лъугьунаро. Кванан гIорцIуларев чиясдаги гьев релълъуна», - абун. (Бухари)
ТIадегIанав Аллагьас ﷻ Къуръаналда абун буго (магIна): «Нужеца гьеб ризкъиялдаса Аллагь ﷻ разилъи тIалаб гьабун напакъаде ва садакъаде щиб жо кьуниги, Алагьас ﷻ нужее гьелъул бак1алда гьелдасаги лъик1аб кьола. Аллагь ﷻ вуго ризкъи кьолезул бищунго лъик1ав», - абун. (Сурату «Сабаъ», аят 39)
Баракат тIаде цIалел жалаздасан ккола Къуръан цIали, Аллагьасукьа ﷻ хIинкъун хьвади, дармилъ ритIухълъи, радал хехго рахъин, Аварагасул ﷺ суннат кквей, Аллагьасде ﷻ таваккал гьаби, нигIматазухъ Аллагьасе ﷻ щукру гьаби, мунагьал чуриялъе дугIа гIемер гьаби, гIагарлъиялъулгун гьоркьоблъи цIуни.
