Лъабго гIаламат
Лъабго гIаламат
Рияъ ккола рекIел унтабазул цо унти. Абула рияъалдаса тIуванго вацIцIалъизе цIакъ захIматаб жо бугиланги. Щайин абуни, гIалимзабаз баян гьабухъе, гьеб батIи-батIияб кьералдалъун загьирлъулеб букIун рекIелъ.
ГIумар ибну ХатIабица абун буго: «ГIадамазе жиндир гьечIеб тIабигIат бихьизабулев чи ТIадегIанав Аллагьас ﷻ гIодовегIан гьавизе вуго», - ян.
ГIали ибну Абу ТIалибица абун буго: «Рияъ гьабулесул лъабго гIаламат буго: «Живго вугев мехалъ кIвахIаллъула, гIадамазда гьоркьов вукIаго тирха-кIичун лъугьуна, веццидал - лъикI гьабула, какидал - квеш гьабула», - ян.
ГIабдулкъадир Жиланияс абун буго: «Ихлас батIабахъизе кIола рацIцIадал чагIазда, ай вализабазда. Гьелда тIадчIейги гьабизе ккола, гьеб нахъе инабиялъул мурадалда. ГIужбу, рияъ, нифакъ ккола жинца ракIалда речIчIулел шайтIаналъул чIорал», - ян.
Фузайл ибну ГIиязица абун буго: «ГIадамазе гIоло кинаб букIаниги гIамал гьабичIого тей рияъ ккола. ГIадамазе гIоло гIамал гьаби ширклъунги ккола», - ян.
Рияъалдаги ихласалдаги гьоркьоб бугеб батIалъи щибха бугеб? Рияъ гьабула бихьизелъун, ихлас гьабула Аллагьасде ﷻ гIагарлъизелъун.
Цо-цо гIалимзабаз абуна: «Рияъ гьабулев чи ТIадегIанав Аллагьасда ﷻ тIад велъанхъулев чи ккола. Жиндаги гIадамал цIикIкIун тIадегIаналлъун рихьулев, БетIергьан Аллагь хутIизегIан. Гьев хьвадула гIадамазул разилъи щвеялъе гIоло, Аллагьасул разилъиялдаса гьев уна. Аллагьасул ﷻ ццим бахъинги щола. ХIакъикъаталдаги гьесул рияъ ккола балъгояб ширк. Щайин абуни, гьесул батIияб гIамал гIадамазе гIоло буго, тIасан Аллагьасе ﷻ гIибадатлъун бугин кканиги. Дунялалдаги ахираталдаги гьев чIовогоги хутIула. Рияъалъул гIадамал къиямасеб къоялъ бищун цере рехула жужахIалъуреги.
БетIергьан Аллагьас ﷻ нилъер рекIел унтаби рацIцIад гьареги, хасго рияъ гIадинал квешал унтабаздаса. Аллагьасда ﷻ рагIула нилъер дугIа, гьеб гIибадаталъул гIадалнах бугинги абун бугелъул.
Киданиги тоге лъикIаб гIамал рияъ ккелин хIинкъун. Гьеб шайтIаналъул гукки буго. Гьединго тоге гIадамаздаса нечон лъикIаб гIамал гьабичIогоги.
Аллагьас ﷻ цIунаги.
