Авалалда – вагIза, Ахиралда – баракат
Жакъасеб къоялъ насихIаталъул куц-мухъго биххун бугин абизе бегьула. Щайгурелъул, гIемерлъун ругелъул интернеталдасан гьарулел насихIатал. Гьебги кин гьабулеб? Чиясухъа ккараб квешлъи, гъалатI бихьизабулеб буго гIадамал релъанхъизе тIамизелъун ва подписчикал гIемерлъизелъун. ГьитIинаб жо бугин кканиги, хIакъикъаталдаги гьеб буго гIезегIан кIудияб жо ва гьелъухъ къиямасеб къоялъ жаваб кьезе ккезеги буго.
Нич, яхI ва намусцин бичулеб буго социалиял гьиназдасан, гьебгиха машгьурлъизе ва гIарац гьабизе бокьиялъ.
ГIумар-асхIабас абуна: «Нужеда нужерго вац гъалатI ккун вихьидал, гьесие кумек гьабе витIун хьвадизе, ТIадегIанав Аллагьасе ﷻ дугIаги гьабе гьеб гIамал тун Аллагьасе ﷻ гьес тавбу гьабизелъун. Нужги рукIунге шайтIаналъул кумекчагIилъун нужерго диналъул вацазда тIад», - ян. ГIадамазул гъалатIал цере лъолезда шайтIабазул солдаталин абун гурони цоги щиб цIарха лъелеб? Гьениб цо рахъалъ нилъедаги гIайиб буго. Нилъее гьединал роликал рокьулел руго ва гьезухъ ралагьулелги руго. Рокьулел рукIинчIелани гьезги гьединал роликал лъезе рукIинчIо. Хайир гьечIеб жо гьезги гьабилищха.
Абу Дардаъ-асхIабасул руго гьадинал рагIаби: «Балъго насихIат-вагIза чиясе гьабурас гьесдехун кутакаб берцинлъи гьабуна. ТIатун, гIадамазда бихьун гъалатI битIизабурас гьоркьоблъи хвезаби бижизабуна», - ян. Нилъее бокьула гIадамазда рихьизелъун гIайибал чIвазе. Гьедин бегьуларо.
Жакъа нилъеда гьоркьоб гIемер тIибитIараб унти буго чай гьекъолаго гIагарлъи ва росуцоял каки, гьеб гъибат кколеблъи лъалеб бугониги. Гьединлъидал, нилъеца гьеб хабар чIезабизе ккола нилъго мунагьалда гIахьаллъизе бокьун батичIони. Щайгурелъул, мекъаб жоялда тIад кIалъачIого чIарав чи гьелъул гIахьалчилъун лъугьунелъул.
Салафу-салихIуназ насихIат гьабулаан берцинго ва балъго. Дандияс гьеб къабулги гьабулаан. Ибну Мубаракида гьикъула гIамалазул лъикIаб щиб кколебилан? Гьес абула Аллагьасе ﷻ гIоло насихIат гьаби бугин абун. ГIадамал дагIбадизе лъугьиндал, хIасил щиб кколеб? Авалалда дагIбади букIуна, бакьулъе щведал - живго кIодолъун вихьула ва ахиралда - цоцаздехун рокьукълъи баккула. Гьеб кинабго гьукъарабги буго. НасихIат гьабиялда жаниб авалалда буго вагIза, ахиралда - баракат. ГIисада гьикъула Аллагьасе гIоло насихIат гьабулев чи щив кколевилан абун. Аллагьасул хIакъ гIадамазул хIакъалдаса цебе гьабулев чи вуго, гьесие зарал кканигийин жаваб гьабула ГIисаца. НасихIат гьабизе лъазе ккола, насихIат гьабулев вугинги абун кинабго жо хвезабизеги рес букIунелъул. ГIадамазул лъикIал рахъал гурони рихьулареллъун гьареги нилъ Аллагьас ﷻ.
ШАМИЛ МУХIАММАДОВ
