ГIибадаталъ ул ракI
Нилъ киналго ТIадегIанав Аллагьасде ﷻ хIажатал руго. БетIергьанасги ﷻ абула нужеца Жинда гьарани, жаваб гьабулин. Гьединлъидал нилъеца дугIа гьабизе ккола. Хасго захIматаб гьаб заманалда. ДугIа гьаби ккола гIибадаталъул жанисеб хIакъикъат, гьелъул ракI гIадаб жо. ДугIа гьабиялда жаниб лагъас жиндирго мискинлъиги, гIодовегIанлъиги, Аллагьасде ﷻ живго хIажалъиги, Аллагьасул бечелъиги, Гьев сундего хIажалъунгутIиги загьир гьабулеб буго. Кинабго жоялъулъ Аллагьас кьураб гурони, щибго жоги щоларо.
Гьес кьураб гьукъизеги, гьукъараб кьезеги кIолев чи зоб-ракьалда щивниги гьечIо. ХIатта, хьитазул чIалал рухьунеб мехалъцин Аллагьасдаса ﷻ букIин бихьизе ккола. Щайин абуни, Гьесул къудрат гьечIого нилъеда щибниги гьабун бажаруларо. Аллагьасде ﷻ мугъчIвай гьабурав, Гьесдаса кумек гьарарав чи Аллагьас ﷻ хьул къотIун толаро. Цогидал ханзабазда гьардаравгIан лагъ рихуна, ТIадегIанав Аллагьасе лагъ, Жинда гьардаравгIан, вокьула. Цогидал ханзабазул, жидеда гьардани ццим бахъуна, ТIадегIанав Аллагьасул, Жинда гьардечIони, ццим бахъуна. Муъминчиясул цониги дугIа гIадада толаро.
Гьес гьарараб жо кьечIонигицин, жибго дугIа гьаби гIибадатлъун хъвала. ГIатIилъиялда, сах-саламатго вугеб мехалъ Аллагьасде ﷻ кидаго гьардолев муъминчи, къварилъиялде ккараб мехалъ Аллагьас гьесул дугIа къабул гьабула. ТIадегIанав Аллагьас ﷻ Жинда гьарараб жо, яги гьарараб сагIаталъ кьола, яги гьеб гьарараб жоялда релълъараб тIаде бачIунеб квешлъи гьесдаса нахъчIвала, яги гьараралдасаги цIикIкIараб ахираталда кьола.
ХIадисалда буго: «Нужер цоясул дугIаялъе жаваб гьабула, гьес мунагь бугеб жоялдалъун яги гIагарлъиялъулгун бухьен тIезабулеб жоялдалъун дугIа гьабичIебгIан заманалда», - абун. Аллагьасул ﷻ къадарги дугIаги къиямасеб къо чIезегIан цоцалъ хIалтIулел рукIуна.
ДугIа гьабулевги вукIаго лагъ гьалаглъуларин хIадис буго. Вализабазул цояс абулеб буго жив хIинкъуларила дугIа къабуллъичIого хутIилин абураб жоялдаса, жив хIинкъулила дугIа гьабичIого хутIилин абуралдаса. ДугIаялъ тIаде бачIаралъеги бачIине бугелъеги мунпагIат гьабулин буго хIадис. ХIатта, мунагьал цIикIкIунин абунги дугIа къабуллъиялдаса хьул къотIугеян буго. Иблисалъ жиб къиямасеб къо чIезегIан чIаго теян гьарараб мехалъ, аллагьас ﷻ гьелъул гьарицин къабул гьабунила.
